IRS: Роҳи мошингарди Душанбе-Чанок кушода буда, вобаста ба зарурат ҳаракати мошинҳои боркаши ядакдор ва «Фура»-ҳо муваққатан маҳдуд мешавад

ДУШАНБЕ, 22.01.2021 /АМИТ«Ховар»/. Шурӯъ аз шоми дирӯз дар масири роҳи мошингарди Душанбе — Чанок бориши барф беист ва пуршиддат буда, баландии барф дар баъзе минтақаҳо ба 50 сантиметр расид. Дар робита ба ҳолати баамаломада техникаву механизмҳои филиали Ширкат ба макони зарурӣ сафарбар шуда, фаъолияти шабонарӯзӣ ба роҳ монда шудааст. Ҳоло роҳ кушода буда, вобаста ба зарурат ҳаракати мошинҳои боркаши ядакдор ва «Фура»-ҳо муваққатан маҳдуд карда мешавад. Дар ин бора ба хабарнигори  АМИТ «Ховар» аз Маркази матбуоти филиали Ширкати саҳомии “Инновейтив Роуд Солюшнз ЛТД” дар Ҷумҳурии Тоҷикистон хабар доданд.

Ин кор барои эҷод нашудани монеа зимни ҳаракати дигар нақлиёт амалӣ мегардад. Аз ронандагон хоҳиш карда мешавад, ки бидуни омодагие, ки ба мавсими сармо хос аст, ба роҳ набароянд. Фаъолияти асосии ширкат на дар плазаҳои толлингӣ, балки дар масири роҳи мошингард ба роҳ монда шудааст. Ҳар рӯз садҳо мутахассиси соҳибтаҷриба-устоҳои роҳ бо кумаки техникаи махсус ба тозакунии роҳ аз барф ва коркарди он бо маводи зиддилағжиш машғул буда, кӯшиш ба харҷ медиҳанд, ки ҳаракати муназзаму бехатари воситаҳои нақлиёт таъмин бошад.