Шералӣ Кабир дар Исфара бо фаъолияти корхонаҳои саноатии «Субҳи Ватан» ва «Шираи гандум» шинос шуд

Январь 13, 2021 09:10

ДУШАНБЕ, 13.01.2021 /АМИТ «Ховар»/. Вазири саноат ва технологияҳои нави ҷумҳурӣ Шералӣ Кабир бо раиси шаҳри Исфара Баҳоваддин Баҳодурзода ҷиҳати шиносоӣ бо фаъолияти корхонаҳои саноатӣ  аз ҷамъиятҳои саҳомии «Корхонаи кимиёвӣ», «Тамохуш», Комбинати консервабарорӣ, «Субҳи Ватан»ва «Шираи гандум» дидан намуд.

Тавре аз маркази матбуоти раиси шаҳри Исфара ба АМИТ “Ховар” иттилоъ доданд, зимни суҳбат бо саноатчиён Шералӣ Кабир таъкид намуд, ки барои амалӣ намудани ҳадафи чоруми стратегӣ-саноатикунонии босуръати мамлакат ва рушди соҳа, пеш аз ҳама, роҳандозии тадбирҳое, чун ташкили минтақаи озоди саноатӣ-инноватсионӣ, ҷалби сармоягузорони потенсиалӣ ва воридсозии технологияи пешқадам, ташаккули системаи пешбурди лоиҳаҳои инвеститсионӣ ва иқлими созгори сармоягузорӣ зарур аст. Зеро чунин тадбирҳо имконият медиҳанд, ки масъалаҳои иҷтимоии Исфара, махсусан таъсиси ҷойҳои нави корӣ ва мушкилоти инфрасохтор ҳал карда шаванд.

Ҳамзамон Вазири саноат ва технологияҳои нави ҷумҳурӣ Шералӣ Кабир ба масъулини соҳа доир ба ҷалби сармояи мустақим, бунёди корхонаҳои нави истеҳсолӣ, ба кор андохтани корхонаҳои аз фаъолият бозмонда, бобати истеҳсоли маҳсулоти баландсифату рақобатпазир, истифодаи технологияҳои муосир ва дар ин замина афзун намудани ҳаҷми истеҳсоли маҳсулоти мутобиқ ба талаботи бозор дастуру супоришҳои мушаххас дод.

Исфара яке аз шаҳрҳои саноатии дорои имконияти васеи захираи ашёи хом буда, дорои 49 корхонаҳои хурду бузурги саноатӣ мебошад. Дар сурати истифодаву корбурди пурраву самарабахши иқтидорҳои бузурги истеҳсолии корхонаҳои саноатӣ ва дигар захираву имконияти моддии мавҷуда соҳаҳои хоҷагии халқи шаҳр рушду инкишоф ёфта, дар пешрафту тараққиёт ва татбиқи ҳадафи чоруми стратегии мамлакат-саноатикунонии босуръат саҳми назаррас мегузоранд.

Соҳаи саноати Исфара яке аз ҷузъҳои таркибии саноати ҷумҳурӣ ба ҳисоб рафта, дар он иқтидори калони истеҳсолӣ, аз ҷумла барои истихроҷи ангиштсангу нафт, истеҳсоли масолеҳи сохтмон, маҳсулоти саноати кимиёю металлургияи ранга, маводи хӯрока ва консерваҳои мевагию сабзавотӣ мавҷуд мебошанд. Саноатчиёни Исфара бо меҳнати босамар ва амалҳои некбинонаи худ баҳри бунёди ҷомеаи навин ва накӯаҳволии халқ якдилона саъю кӯшиш ба харҷ дода, бо истифода аз имконоти мавҷуда бо иҷрои барномаҳои умумидавлатӣ ва соҳавӣ ба ҳадафҳои созандаву бунёдкоронаи хеш то ҷойе комёб гардидаанд.

Мақомоти иҷроияи ҳокимияти давлатии шаҳр диққати роҳбарону мутахассисони соҳа ва соҳибкоронро ба истифодаи самараноки иқтидорҳои мавҷуда, истеҳсоли маҳсулот бо истифодаи ашёи хоми маҳаллӣ ва рақобатпазирии маҳсулоти содиротшаванда ва таъсиси корхонаҳои нав бо дарназардошти ҷорӣ кардани технологияҳои замонавӣ равона кардааст.

Январь 13, 2021 09:10

Хабарҳои дигари ин бахш

МУБОРАК БОД! Бо Фармони Президенти Тоҷикистон ба Сардори Хадамоти гумрук рутбаи генерал-лейтенанти хадамоти гумрук дода шуд
ТОҶИКОН ДАР АҲДИ СОМОНИЁН СОҲИБИ ДЕВОНИ МӮҲТАСИБ БУДАНД. Ба Рӯзи кормандони мақомоти гумрук бахшида мешавад
Форуми байналмилалии иқтисодии «ИДМ — 30 сол» дар Москва баргузор мешавад
Дар Душанбе қарордоди марҳилаи дуюми лоиҳаи нақби «Истиқлол» ба имзо расид
Андозсупорандагони беҳтарини соли 2020 муайян гардиданд
Тоҷикистон ва Франсия ба ҳамкории муштарак дар самти тағйирёбии иқлим ва ҳифзи пиряхҳо тақвият мебахшанд
Дар Ҷамоати деҳоти Норини ноҳияи Ёвон машварати омӯзишии кишоварзӣ доир гардид
Дар Кӯлоб корхонаи дару тирезаҳои пластикӣ бо номи «Ҳаким» ба истифода дода шуд
Бо иштироки Сарвазири мамлакат Қоҳир Расулзода маҷлиси ҷамъбасти натиҷаҳои рушди иҷтимоию иқтисодии вилояти Хатлон дар соли 2020 баргузор гардид
Ҳайвоноту парандагони ваҳшӣ дар Бадахшон бо анвои гуногуни хӯрокӣ таъмин шуданд
Путин ба ҳукумат супориш дод, ки масъалаи ҷалби содаи муҳоҷиронро, аз ҷумла аз Тоҷикистон, Ӯзбекистон ва Украина ба сохтмонҳои Россия баррасӣ кунад
Ҳамлу нақли мусофирон тавассути ширкатҳои ҳавопаймоӣ дар соли 2020 то 60% коҳиш ёфт