АЗ ҲАР ВАҶАБ ЗАМИН САМАРАНОК ИСТИФОДА МЕБАРЕМ! Аз ҷониби КИ ХХДТ дар шаҳри Кӯлоб 4 тонна картошка кишт карда шуд

ДУШАНБЕ, 22.02.2021 /АМИТ «Ховар»/. Бо ташаббуси Кумитаи иҷроияи Ҳизби Халқи Демократии Тоҷикистон  дар шаҳри Кӯлоб волонтёрон ва аъзоёни  ҳизб  дар замини хоҷагии ёрирасони назди кумита ба миқдори 4 тонна картошкаро  кишт намуданд.

Тавре аз КИ ХХДТ дар шаҳри Кӯлоб ба АМИТ «Ховар» хабар доданд,  мақсад аз  роҳандозӣ намудани  иқдоми мазкур ин дар амал тадбиқ намудани дастуру супоришҳои Пешвои миллат муҳтарам Эмомалӣ Раҳмон оид ба истифодаи самараноки қитъаҳои замин ва расидан ба ҳадафи стратегии мамлакат, яъне  саҳм гузоштан дар таъмини амнияти озуқавории мамлакат мебошад.

Мояи хурсандист, ки  сокинони мамлакат ҳар ваҷаб заминро самаранок истифода бурда, дар таъмини амнияти озуқавории мамлакат саҳми намоён мегузоранд ва хусусан имрӯзҳо, ки мавсими кишту кор фаро расидааст, ин иқдом дар саросари кишвар   оммавӣ мегардад.

19 феврал   ҷиҳати самаранок истифода бурдани ҳар ваҷаб замин дар масоҳати қариб  0,5 га (50 сотих)-и заминҳои бекорхобидаи  Беморхонаи клиникавии вилоятии ба номи С. Қутфиддинови вилояти Суғд  низ картошка кишт карда шуд.

Ин тадбир имкон медиҳад, ки талаботи озуқавории Беморхонаи вилоятӣ дар фосилаи муайян бо «нони дуюм» таъмин гардад. Аҳли заҳмати Беморхонаи клиникавии вилоят бо мақсади сазовор истиқбол намудани 30-солагии Истиқлоли давлатии Ҷумҳурии Тоҷикистон корҳои ободонию созандагиро амалӣ  намуда истодаанд. Дар мавсими имсола аллакай дар заминҳои бекорхобидаи беморхона ниҳолҳои ҳамешасабз, мевадиҳанда ва ороишӣ шинонида шуданд.