Дар Хуҷанд майдони ҳудуди Муҷассамаи ёдгории шаҳидони ҶБВ мавриди навсозӣ қарор мегирад

ДУШАНБЕ, 02.02.2021 /АМИТ «Ховар»/. Вобаста ба эълон шудани Солҳои рушди деҳот, сайёҳӣ ва ҳунарҳои мардумӣ ва таҷлили 30-солагии Истиқлоли давлатӣ майдони ҳудуди Муҷассамаи ёдгории шаҳидони Ҷанги бузурги ватании солҳои 1941-1945 дар шаҳри Хуҷанд мавриди навсозӣ қарор мегирад.

Тавре аз аз мақомоти иҷроияи ҳокимияти давлатии шаҳри Хуҷанд иттилоъ доданд, навсозии майдони мазкур бо мақсади фароҳам овардани истироҳату фароғат барои шаҳрвандон ва обод намудани як гўшаи сераҳолии шаҳр мебошад.

Раҷаббой Аҳмадзода зимни шиносоӣ бо лоиҳаҳои иншооти пешниҳодшуда таъкид намуд, ки тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон шаҳри Хуҷанд бояд симои нав ба бар намояд. Амалӣ шудани иқдоми мазкур бо риояи тамоми талаботи меъморию шаҳрсозӣ шаҳри бостонии Хуҷандро ба «Тирози ҷаҳон»-и воқеӣ мубаддал хоҳад гардонд.

Ҳамчунин ба масулин ҷиҳати такмили лоиҳа бо назардошти васеъ намудани роҳҳо, чароғонкунии атроф, зеббахшии биноҳои баландошёнаи истиқоматию хизматрасонӣ, сабзазоркунии муҳити атроф ва ғайраҳо супоришҳои мушаххас дода шуд.