Дар қисмҳои низомии Хоруғ бахшида ба ҷашни Қувваҳои мусаллаҳ Рӯзи дарҳои кушод оғоз ёфт

Февраль 10, 2021 15:32

ХОРУҒ, 10.02.2021. /АМИТ «Ховар»/. Қисми низомии қӯшунҳои зудамали Вазорати мудофиаи Ҷумҳурии Тоҷикистон, мустақар дар шаҳри Хоруғ дар ҳамкорӣ бо комиссариати ҳарбии Вилояти Мухтори Кӯҳистони Бадахшон бахшида ба 28-умин солгарди таъсиси Қувваҳои Мусаллаҳи ҷумҳурӣ барномаи Рӯзи дарҳои кушод доир намуд, ки дар он 100 нафар хонандагони синфҳои болоии муассисаҳои таълимии шаҳр ширкат намуданд.

Сардори шуъбаи даъват ва тайёрии ҷавонон ба хизмати ҳарбии комиссариати ҳарбии вилоят Дарвеш Авазбеков гуфт, ки “ҳамасола дар остонаи таҷлили Рӯзи Артиши миллӣ қисмҳои низомӣ дари худро ба рӯи хонандагони муассисаҳои таълимӣ боз мекунанд ва наврасонро бо шароити будубоши сарбозон, аз ҷумла ҷои хоб, утоқҳои таълимӣ, китобхона, синфхонаи технологӣ, ошхонаву хонаи фароғатӣ, анборхонаи захираи озуқаворӣ, майдончаи машқҳои тактикию амалӣ шинос мекунанд. Ба онҳо имконият медиҳанд, ки савори мошинҳои зиреҳпӯш шаванд, баъзе аз силоҳу муҳимоти ҷангиро ба даст гиранд ва аз афсарон тарзи истифодаи онро биомӯзанд. Ҳамчунин ба ошхона даромада, ҳамроҳ бо сарбозон хӯрок истеъмол менамоянд, аз китобхонаву бунгоҳи тиббӣ хабар мегиранд”.

Дар ҷараёни баргузории Рӯзи дарҳои кушод қисмҳои низомӣ тамоми шароитро барои наврасон омода мекунанд, то онҳо дар ин рӯз худро лаҳзае ҳам бошад, чун  сарбози ҳақиқӣ эҳсос кунанд. Баргузории чунин тадбирҳои муассир имконият дод, ки дар се соли охир нақшаи даъвати баҳорию тирамоҳӣ дар шаҳру ноҳияҳои вилоят дар як рӯз таъмин шавад. Даъватшавандагон довталабона ҳамроҳ бо волидон  ба комиссариати ҳарбӣ ҳозир шуда, баъди ташхис ба хизмати Ватан-Модар раҳсипор мегарданд.

Дар панҷ соли охир кулли қисмҳои низомӣ ва дидбонгоҳҳои марзӣ аз нав бунёд ва бо техникаву таҷҳизоти муосири ҳарбӣ таъмин гардиданд. Шароити қисмҳои низомӣ ва сатҳу сифати хизмати сарбозону афсарон мавриди таваҷҷуҳи бевоситаи Сарфармондеҳи Олии Қувваҳои мусаллаҳи ҷумҳурӣ, Президенти Ҷумҳурии Тоҷикистон муҳтарам Эмомалӣ Раҳмон қарор дошта, дар давраи соҳибистиқлолӣ инфрасохтори қисмҳои низомӣ ва дидбонгоҳҳои марзӣ комилан ба замони муосир мутобиқ гардонида шуданд.

Сардори шуъбаи даъват ва тайёрии ҷавонон ба хизмати ҳарбии комиссариати ҳарбии вилоят Дарвеш Авазбеков гуфт, ки Рӯзи дарҳои кушод дар қисмҳои низомӣ ва бунгоҳҳои марзӣ то 18 феврали соли равон идома меёбад. Масъулини комиссариатҳои ҳарбии шаҳру ноҳияҳои вилоят муваззаф шудаанд, ки ҳарчӣ бештар ҷавонони то синни даъватиро ба ин чорабиниҳо  ҷалб намоянд.

Февраль 10, 2021 15:32

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»