Дар мавзеъҳои осебпазири ноҳияи Ховалинг корҳои соҳилбандӣ ҷараён доранд

ХОВАЛИНГ, 10.02.2021 /АМИТ «Ховар»/. Бахши Кумитаи ҳолатҳои фавқулода ва мудофиаи гражданӣ дар ноҳияи Ховалинг дар ҳамкорӣ бо мақомоти иҷроияи ҳокимияти давлатӣ бо мақсади пешгирӣ   аз селу обхезӣ ва эмин нигоҳ доштани аҳолӣ, заминҳои кишт ва молу амволи сокинон дар мавзеъҳои осебпазир корҳои соҳилбандӣ ҷараён доранд.

Тавре мухбири минтақавии АМИТ “Ховар” иттилоъ медиҳад, бо саршавии боронҳои баҳорӣ сатҳи оби ҷӯю дарёҳо баланд шуда, соҳилҳоро рахна мекунад.

Ба гуфти  сардори бахши Кумитаи ҳолатҳои фавқулода ва мудофиаи гражданӣ дар ноҳияи Ховалинг Дилшод Ҳакимов, корҳои соҳилбандӣ дар шаш мавзеъ идома доранд ва дар ду паҳлӯи дарёчаи оби мазор техника ва сокинон ҷалб карда шудаанд. Гарчанде соли гузашта дар ин мавзеъ соҳилҳо рахна нагардида буданд, имсол хатари ба вуқӯъ пайвастани холатҳои фавқулода эҳтимол дорад. Аз ин рӯ ба корҳои соҳилмустаҳкамкунӣ сокинони ду ҷамоати деҳот ҷалб гардидаанд.

Бино ба иттилои бахши Кумитаи ҳолатҳои фавкулода ва мудофиаи граждании ноҳияи Ховалинг, ҳашари дастаҷамъона ва корҳои соҳилбандӣ дар минтақаҳои осебпазир то оғози боронҳои сели баҳорӣ идома меёбанд.