Пас аз Душанбе «Ӯзбекистон ҳаво йуллари» иртиботи ҳавоиро бо Деҳлӣ аз нав барқарор намуд

ДУШАНБЕ, 25.02.2021 /АМИТ «Ховар»/. «Ӯзбекистон ҳаво йуллари» иртиботи мунтазами ҳавоиро дар масири «Тошканд-Деҳлӣ-Тошканд» аз 5 март барқарор мекунад, хабар медиҳад АМИТ «Ховар» бо истинод ба хадамоти матбуоти ширкати миллии ҳавопаймоии Ӯзбекистон.

Ёдовар мешавем, ки Ӯзбекистон аз 16 марти соли 2020 бо сабаби таҳдиди паҳншавии COVID-19 иртиботи нақлиётиро бо кишварҳои дигар муваққатан боздошт. Аммо, ҳоло иртиботи ҳавоӣ байни давлатҳо тадриҷан барқарор карда мешавад. Моҳи сентябри соли гузашта Ӯзбекистон иртиботи ҳавоиро бо Беларус, Туркия, Аморати Муттаҳидаи Араб, Қазоқистон ва Қирғизистон барқарор намуд.

Тавре АМИТ «Ховар» пештар хабар дода буд, ширкати «Ӯзбекистон ҳаво йуллари» 20 январи соли равон парвозҳоро ба Тоҷикистон барқарор намуд. Субҳи ҳамон рӯз парвози нахустин пас аз баҳори соли гузашта аз Тошканд ба Душанбе, баъд аз танаффуси вобаста ба пандемияи коронавирус анҷом дода шуд. Соати 12:00 ба вақти маҳаллӣ ширкати ҳавопаймоии Ӯзбекистон парвози бозгаштро аз пойтахти Тоҷикистон анҷом дод.

Зикр карда шуд, ки парвози Тошканд-Душанбе дар ибтидо ҳафтае як маротиба-рӯзҳои чоршанбе сурат мегирад ва дар оянда ҳавопаймоҳо ҳафтае ду маротиба- рӯзҳои сешанбе ва ҷумъа парвоз хоҳанд кард.