Стипендияи ректори Донишкадаи сайёҳӣ, соҳибкорӣ ва хизмат таъсис дода мешавад

ДУШАНБЕ, 12.02.2021 /АМИТ «Ховар»/. Имсол дар Донишкадаи сайёҳӣ, соҳибкорӣ ва хизмат бо мақсади ҳавасмандкунӣ, дастгирии моддиву маънавии донишҷӯёни фаъол Стипендияи ректори донишкада таъсис дода мешавад. Дар ин бора 11 феврал  зимни нишасти матбуотӣ ректори Донишкадаи сайёҳӣ, соҳибкорӣ ва хизмат Убайдулло Асрорзода ба хабарнигорон иттилоъ дод.

Вобаста ба ин қарори ректори Донишкада ба тасвиб расида, тибқи он низомнома, ҳайати комиссия ва нақшаи тақсими он тасдиқ гардидааст.

70 фисади баҳои аъло, рафтори намунавӣ ва иштироки фаъолона дар корҳои ҷамъиятӣ аз талаботи асосӣ барои довталабон мебошад.

Дар асоси низомнома, гирандагони стипендияи ректори Донишкада инчунин аз супоридани ҳаққи шартномаи таҳсил озод мегарданд. Маблағи стипендия 300 сомониро ташкил дода, аз ҳисоби маблағҳои махсус пешбинӣ шудааст.

Ба зикри ректори донишкада, аз ҷониби раёсат ҷиҳати ҳавасмандии бештари ҷавонону устодони донишкада ба корҳои илмию таҳқиқотӣ ва ҳимояи саривақтии рисолаҳои номзадӣ ба ҳар нафар ба андозаи 10 000 сомонӣ тақдим карда мешавад.

Соли 2020 ба 5 нафар устодон, ки рисолаҳои худро ҳимоя намуданд, ба андозаи 10 000 сомонӣ дода шуд.

Ҳамзамон бо мақсади баланд бардоштани сатҳи иҷтимоии кормандони донишкада шурӯъ аз 1 октябри соли 2020 музди маоши вазифавии кормандон мутаносибан то 30% баланд бардошта шуда, кумакҳои яквақтаинаи молиявӣ низ пайваста ба ашхоси ниёзманд расонида мешаванд. Дар донишкада 7 нафар донишҷӯи ятими кулл пурра аз маблағи таҳсил озод карда шуда, онҳо мунтазам аз кумакҳои моддиву маънавӣ бархӯрдор мешаванд.

Убайдулло Асрорзода дар идома аз дастоварду нақшаҳои оянда ибрози назар намуда, зикр кард, ки яке аз рӯйдодҳои муҳими донишкада дар самти равобити хориҷӣ дар он аст, ки дар соли 2020 Донишкада шомили Ассотсиатсияи донишгоҳҳои Осиё гардид.

Ҳамзамон дар ин давра тариқи онлайн бо намояндагони ширкати байналмилалии таҳсилотӣ-фарҳангии Пекин гуфтушунид анҷом дода шуд. Дар чорчӯбаи консепсияи «Як камарбанд – як роҳ» ҷиҳати шомил намудани Литсейи Донишкадаи сайёҳӣ, соҳибкорӣ ва хизмат ба Ассотсиатсияи ҳамкории байналмилалии коллеҷҳои «Роҳи абрешим»  гуфтушунид анҷом дода шуд.

«Тибқи натиҷаи гуфтушунид дар назар аст, ки дар доираи ҳамкорӣ  муҳассилин аз рӯйи самтҳои «Фаъолияти ошпазӣ ва қаннодӣ», «Фаъолияти меҳмонхонавӣ», «Низомҳои иттилоотӣ ва технологияҳо» ва ғайра омӯзонида шаванд»,-зикр кард ректори Донишкадаи сайёҳӣ, соҳибкорӣ ва хизмат Убайдулло Асрорзода.