Сулаймон Султонзода: Соли 2020 тавассути тадбирҳои андешида 84,9 фоиз зарари молиявӣ барқарор гардид

ДУШАНБЕ, 16.02.2021 /АМИТ «Ховар»/.  Дар соли 2020 мутахассисони самти назорати давлатии молиявии Агентӣ дар вазорату идораҳо, мақомоти иҷроияи маҳаллии ҳокимияти давлатӣ, марказҳои татбиқи лоиҳаҳои сармоягузорӣ, субъектҳои хоҷагидори давлатӣ ва дигар муассисаҳои буҷетӣ 811 тафтишу санҷиши молиявӣ гузаронида, ба маблағи умумии 348,8 миллион  сомонӣ зарари молиявӣ ошкор намуданд, ки тавассути тадбирҳои андешида аз ин маблағ 295,9 миллион сомонӣ ё 84,9 фоиз барқарор карда шудааст. Аз маблағҳои рӯёнидашуда 76,3 миллион сомонӣ ба буҷети давлатӣ ва 219,6 миллион сомонӣ ба корхонаву муассисаҳо рост меояд. Дар ин бора директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон, генерал-майори адлия  Сулаймон Султонзода 16 феврал зимни нишасти матбуотӣ иброз дошт, иттилоъ медиҳад хабанигори АМИТ «Ховар».

Мавсуф иброз намуд, ки таҳлили вазъи ҷинояткорӣ нишон медиҳад, ки дар ин давра шумораи бештари ҷиноятҳо аз ҷониби кормандони мақомоти иҷроияи маҳаллии ҳокимияти давлатӣ – 177 адад, соҳаҳои маориф ва илм — 136, тандурустӣ ва ҳифзи иҷтимоии аҳолӣ — 104, кишоварзӣ — 101, меҳнат, муҳоҷират ва шуғли аҳолӣ — 66, Кумитаи давлатии идораи замин ва геодезӣ — 99, бонкҳои давлатию тиҷоратӣ — 163, дигар идораю корхонаҳои давлатӣ — 411, субъектҳои хоҷагидории ғайридавлатӣ, соҳибкорони инфиродӣ ва шаҳрвандон — 835   ҷиноят содир гардидааст.

Сулаймон Султонзода афзуд, ки 60 ҳолати вайрон намудани талаботи моддаи 22-и Қонуни Ҷумҳурии Тоҷикистон «Дар бораи муқовимат бо коррупсия», ки хизмати якҷоя ва таъйини хешовандони наздик ба мансабҳои давлатӣ ё ба мансабҳои ба онҳо баробаркардашударо манъ намудааст, ошкор карда шуда, ҳуқуқвайронкуниҳои мазкур дар асоси санадҳои эътиноии Агентӣ бартараф карда шудаанд. Ҳамзамон ба Агентӣ ҷиҳати аз экспертизаи давлатии зиддикоррупсионӣ гузаронидан 1015 лоиҳаи санадҳои меъёрии ҳуқуқӣ ворид гардиданд, ки онҳо мавриди баррасӣ қарор гирифта, дар 127 лоиҳа омилҳои бавуҷудоварандаи коррупсия ошкор карда шуда, баҳри бартараф намудани камбудиҳо ба мақомоти таҳиякунандаи лоиҳа бозпас гардонида шуданд.