«ТАБИАТ ЗАНРО БЕШТАР ЭҲТИЁТ МЕКУНАД». Номбар шудани се сабабе, ки чаро баъзе одамон ба коронавирус гирифтор намешаванд

ДУШАНБЕ, 04.02.2021 /АМИТ «Ховар»/. Номзади илмҳои тиб, дотсенти кафедраи бемориҳои сироятии Донишгоҳи РУДН Сергей Вознесенский шарҳ дод, ки чаро баъзе одамон гирифтори коронавирус намешаванд. Ин се сабаб дорад, вале асосӣ — хотираи ҳуҷайравӣ ва масунияти маҳаллӣ мебошад, менависад «РИА Новости».

Агар шахс қаблан ба ягон намуди коронавирус дучор шуда бошад, хавфи сироятёбӣ бо SARS-CoV-2 камтар аст. Ин тавр ҳам мешавад, ки каме пеш аз дучор шудан ба коронавирус одам кадом як сирояти вирусии дигарро аз сар гузаронидааст ва интерферонҳо дар бадани ӯ зиёдтар шудаанд. «Агар онҳо бисёр зиёд бошанд, таъсирпазирӣ нисбат ба уфунатҳои вирусӣ коҳиш меёбад», — нақл кард Вознесенский.

Фарзияи дигар низ мавҷуд аст — масунияти маҳаллӣ ба вирус имкон намедиҳад, ки ба ҳуҷайраҳо дар сатҳи роҳҳои нафаскашӣ дохил шавад. Дақиқан гуфтани ин ки бо кадом сабаб одамон нисбат ба SARS-CoV-2 таъсирнопазир мебошанд, ҳоло ғайриимкон аст. «Ин ҳанӯз дар марҳилаи мубоҳисаи илмӣ қарор дорад», — илова кард коршинос.

Дар омади гап, мардон бештар ба COVID-19 мубтало мешаванд, чунки дар бадани онҳо ретсепторҳои ACE2, ки «нуқтаи вуруд» барои коронавирус мебошанд, зиёдтаранд. Аммо занони синни репродуктивӣ аз ин ҷиҳат  беҳтар маҳфуз мебошанд. «Табиат занро бештар муҳофизат мекунад»,-зикр кард эндокринолог Зӯҳро Павлова.

АКС аз манбаъҳои озод