Кумитаи андози Тоҷикистон ва Хадамоти федералии андози Россия такмили системаи маъмурикунонии андозро баррасӣ намуданд

ДУШАНБЕ, 26.03.2021 /АМИТ «Ховар»/. Кормандони ваколатдори Кумитаи андози назди Ҳукумати Ҷумҳурии Тоҷикистон ва Хадамоти федералии андози Федератсия Россия дар доираи татбиқи муқаррароти Протоколи ҷаласаи 17-уми Комиссияи байниҳукуматӣ оид ба ҳамкории иқтисодӣ миёни Ҷумҳурии Тоҷикистон ва Федератсияи Россия 25 март вохӯрии онлайнӣ доир намуданд.

Тавре Кумитаи андози ҷумҳурӣ хабар медиҳад, ҷаласа ба мавзӯи такмили системаи маъмурикунонии андози Ҷумҳурии Тоҷикистон, аз ҷумла масъалаҳои мошинаҳои назоратӣ-хазинавӣ ва маъмурикунонии ААИ бахшида шуд. Зикр гардид, ки такмили маъмурикунонии андоз, пеш аз ҳама, ба сода кардани риояи қонунгузории андоз аз ҷониби андозсупорандагон, баланд бардоштани сифати фаъолияти мақомоти андози ҷумҳурӣ ва фароҳам овардани шароити мусоид барои пешбурди фаъолияти соҳибкорӣ тавассути такмили қонунгузории андоз равона шудааст.

Иштирокчиёни вохӯрӣ нияти идома додани кор дар формати дуҷониба ва бисёрҷонибаи кумаки техникӣ бо мақсади такмили системаи маъмурикунонии андози Ҷумҳурии Тоҷикистон барои татбиқи муваффақонаи муқаррароти Протоколи мазкурро изҳор намуданд.