МО 198 000 НАФАР ЗИЁД ШУДЕМ! Агентии омор шумораи аҳолии Тоҷикистонро то моҳи январи соли 2021 эълон намуд
![](https://khovar.tj/wp-content/uploads/2021/03/molodyozh-tadzhikistana.jpg)
ДУШАНБЕ, 04.03.2021 /АМИТ «Ховар»/. Шумораи аҳолии Тоҷикистон то 1 январи соли 2021 ба 9 миллиону 504 ҳазор нафар расид. Дар ин бора ба АМИТ «Ховар» аз Агентии омори назди Президенти Ҷумҳурии Тоҷикистон хабар доданд.
Зикр карда мешавад, ки афзоиши табиии аҳолии кишвар соли 2020 2% -ро ташкил додааст, яъне шумораи аҳолӣ тахминан 198 ҳазор нафар афзудааст.
Ба ҳамин тартиб, шумораи аҳолии вилояти Хатлон соли гузашта 82,9 ҳазор нафар, ноҳияҳои тобеи ҷумҳурӣ — 49,5 ҳазор, вилояти Суғд — 49,4 ҳазор, Душанбе — 13,3 ҳазор ва ВМКБ — 2,9 ҳазор нафар афзудааст.
Шумораи таваллуд соли гузашта дар ҷумҳурӣ тақрибан 240 ҳазор нафар ва теъдоди фавтидагон тақрибан 42 ҳазор нафарро ташкил дод.
Дар аввали соли равон дар вилояти Хатлон 3 миллиону 425 ҳазор нафар, дар вилояти Суғд 2 миллиону 754 ҳазор нафар, дар ноҳияҳои тобеи марказ 2 миллиону 215 ҳазор нафар, дар Душанбе 880 ҳазор нафар ва дар ВМКБ 231 ҳазор нафар одамон зиндагӣ мекарданд.
Ёдовар мешавем, ки соли 2019 Департаменти иқтисодӣ ва иҷтимоии СММ пешгӯиҳои демографӣ нашр карда буд, ки тибқи он дар тӯли 30 сол шумораи аҳолии ҷаҳон 2 миллиард афзоиш меёбад. Мутобиқи ин дурнамо, шумораи умумии аҳолии Тоҷикистон то соли 2050 тақрибан ба 16 миллион нафар ва то соли 2100 ба 25 миллион нафар хоҳад расид.
АКС аз бойгонӣ