Ҳар ҳафта рӯзҳои истироҳатӣ дар боғҳои пойтахт барномаҳои фарҳангӣ доир карда мешаванд

ДУШАНБЕ, 27.04.2021 /АМИТ «Ховар»/. Бахшида ба 30-солагии Истиқлоли давлатии Ҷумҳурии Тоҷикистон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии шаҳри Душанбе дар ҳамкорӣ бо вазорату идораҳо  ҳар ҳафта рӯзҳои шанбе ва якшанбе дар боғҳои пойтахт силсилабарномаҳои фарҳангӣ доир карда мешаванд.

Тавре муовини Раиси Кумитаи кор бо ҷавонон ва варзиш Дилноза Аҳмадзода ба АМИТ «Ховар» иттилоъ дод, барномаҳои мазкур баҳри фароғати сокинону меҳмонони пойтахти фарҳангии Иттиҳоди Давлатҳои Мустақил- шаҳри Душанбеи ташкил шуда, мақсад аз баргузории онҳо дар сатҳи баланд таҷлил намудани 30- солагии Истиқлоли давлатии Ҷумҳурии Тоҷикистон ва баланд бардоштани ҳисси ватандӯстии сокинон мебошад.

Тибқи тақвими барномаҳои фарҳангӣ оид ба боғҳои фарҳангиву фароғатии  шаҳри Душанбе 1 май Донишгоҳи технологии Тоҷикистон дар Боғи Абулқосим Фирдавсӣ, Донишгоҳи техникии Тоҷикистон ба номи М.Осимӣ дар Боғи Садриддин Айнӣ, Донишгоҳи омӯзгории Тоҷикистон ба номи С.Айнӣ дар майдончаи фарҳангу фароғатӣ дар кӯчаи Сино, бахши фарҳангии мақомоти иҷроияи ҳокимияти давлатии ноҳияи Шоҳмансур ва Консерваторияи миллии Тоҷикистон дар Боғи «Куруши Кабир» барномаи фарҳангии хешро манзури сокинону меҳмонон мегардонанд.

2 май, рӯзи якшанбе бахши фарҳанги мақомоти иҷроияи ҳокимияти давлатии ноҳияи Фирдавсӣ, Клуби марказонидашудаи Раёсати фарҳанги шаҳри Душанбе дар Боғи Абулқосим Фирдавсӣ, бахши фарҳанги ноҳияи Сино ва Муассисаи давлатии «Ансамбли  тарона ва рақси «Сомон»» дар Кӯли ҷавонон, бахши фарҳанги ноҳияи Исмоили Сомонӣ ва Раёсати фарҳанги шаҳр Душанбе дар назди Шаршараи «Наврӯзгоҳ» ва Вилояти Мухтори Кӯҳистони Бадахшон дар Боғи Садриддин Айнӣ барномаҳои фарҳангии худро доир менамоянд.

Ёдовар мешавем, ки барномаҳои фарҳангӣ ҳар ҳафта рӯзҳои шанбе ва якшанбе аз соати 18:00 то 19:00 доир мегарданд.

Акс аз бойгонии АМИТ «Ховар»