Чемпионати Осиё оид ба бокс дар шаҳри Дубайи Аморати Муттаҳидаи Араб гузаронида мешавад

ДУШАНБЕ, 29.04.2021 /АМИТ «Ховар»/. Чемпионати қарибулвуқӯи Осиё оид ба бокс на дар  шаҳри Деҳлии Ҳиндустон, балки дар шаҳри Дубайи Аморати Муттаҳидаи Араб баргузор мешавад. Чемпионати мазкур 21 май оғоз ёфта, то 1 июн идома меёбад. Дар он дастаи мунтахаби Тоҷикистон дар ҳайати 14 нафар иштирок мекунад. Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон хабар дод.

Роҳбарияти Конфедератсияи бокси Осиё вазъиятро дар робита ба пандемияи коронавирус дар Ҳиндустон зери назар дошта, тасмим гирифтанд, ки мусобиқа дар шаҳри  Дубай гузаронида шавад. «Маъмурияти Конфедератсияи бокси Осиё ва роҳбарияти созмон омодаанд ба ҳар дастае, ки дар бақайдгирӣ ва ҳар масъалаи дигар ба дастгирӣ ниёз доранд, кумак кунад»,-омадааст дар изҳороти ин созмон. Қоидаву шароити иштирок дар чемпионат ҳамон таврест, ки дар роҳнамои ҳайати дастаҳо, ки аввали моҳи март ба федератсияҳои миллӣ дастрас шуда буд, зикр гардидааст. Муштзанҳое, ки давоми солҳои 1980 то 2002 таваллуд шудаанд, метавонанд дар чемпионат ширкат намоянд.

Хотиррасон мешавем, ки Чемпионати Осиё оид ба бокс аз рӯи 10 категорияи вазнӣ миёни бонувон: (48кг; 51кг; 54кг; 57кг; 60кг; 64кг; 69кг; 75кг; 81кг; +81кг) ва 10 категорияи вазнӣ миёни мардон: (49кг; 52кг; 56кг; 60кг; 64кг; 69кг; 75кг; 81кг; 91кг; +91кг) сурат мегирад.

Бонувон

-51кг – Сумайя Қосимова

-51кг – Руҳафзо Ҳақназарова

-57кг – Миҷгона Самадова

-60кг – Шоира Зулқайнарова

-69кг – Нилуфар Бобоёрова

Мардон

-52кг – Иззатулло Алиев

-56кг – Бахтовар Сагизов

-60кг – Сомон Ҳабибов

-64кг – Баҳодур Усмонов

-69кг – Саидикром Амонов

-75кг – Мирзомуҳаммад Бахтиёр

-81кг – Шаббос Негматуллоев

-91кг – Ҷасур Қурбонов

+91кг – Сиёвуш Зуҳуров

Варзишгаронро дар ин сафар мураббиён Мирзо Шамсиев, Парвиз Ахмедов ва Хуршед Ҷӯраев ҳамроҳӣ мекунанд.

Дар намуди бокс варзишгарони мо ду роҳхати Бозиҳои олимпӣ ба даст овардаанд. Баҳодур Усмонов дар вазни 64кг ва Шаббос Негматуллоев дар вазни 81кг Ҷумҳурии Тоҷикистонро дар Бозиҳои олимпии Токио, ки аз 23 июл то 8 августи соли 2021 баргузор мешавад, намояндагӣ мекунанд.