РӮДАКӢ, 28.04.2021 /АМИТ «Ховар»/. Бо ташаббуси раиси ноҳияи Рӯдакӣ Азизулло Исматзода ва Идораи давлатии беҳдошти замин ва обёрии ноҳияи Рӯдакӣ  37 ҳазор метр канали оби полезии Ҷамоати деҳоти Лоҳур аз гилу хоку санг тоза карда шуда, маҷрои каналҳо барқарор ва мавриди баҳрабардории аҳолӣ қарор дода шуд.

Канали мазкур бо пойгоҳҳои обкашонияш аз сабаби корношоям гардидан бистсолаҳо  боз фаъолият надошт. Хушбахтона, бори дигар   зиёда аз 800  гектар замини ҳудуди  Ҷамоати деҳоти Лоҳур бо оби полезӣ  ва аҳолии ин минтақа бо оби нӯшокии дарёи Кофарниҳон таъмин гардиданд. Ин матлабро зимни суҳбат бо хабарнигори АМИТ «Ховар»  Субҳониддини Маҳмуд муҳандиси  шуъбаи обрасонии идораи давлатии беҳдошти замин ва обёрии ноҳияи Рӯдакӣ  Саъдулло Ғиёсов иброз намуд.

Мавсуф гуфт, ки корҳои барқарорсозии ин канали муҳташам чор моҳ боз идома доранд. Сарчашмаи он аз канали Кӯктоши поён буда, ба воситаи пойгоҳҳои обкашии Лоҳур 0, Лоҳур 1,  Лоҳур 2 , Лоҳур 3, Лоҳур 3а,  Лоҳур 4 ва Лоҳур 6 обрасонӣ карда мешаванд.

Саъдулло Ғиёсов гуфт, ки дар ноҳияи Рӯдакӣ 23 адад пойгоҳҳои обкашӣ мавҷуданд,  ки аз ин 13 ададаш фаъол мебошанд. Айни замон  ду адад дастгоҳи  обкашии пойгоҳи  Хоҷабулбулон дар таъмири ҷорӣ қарор дорад. Дар сурати фаъол гардидани ин дастгоҳҳои обкашӣ қариб 200 гектар заминҳои Ҷамоати деҳоти Эсанбой бо оби полезӣ таъмин мегарданд.

Идораи давлатии беҳдошти замин ва обёрии ноҳияи Рӯдакӣ дорои 42 адад иншооти гидротехникӣ бо дарозии 256 км буда, имсол бо даҳ адад ассотсиатсияҳои истифодабарандагони об дар ҳаҷми 37 миллиону 348 метри кубӣ оби полезӣ шартномаи тарафайн ба имзо расонидааст, ки он барои обёрии 6477 гектар пешбинӣ шудааст.

Ҳамчунин барои беҳгардонии ҳолати мелиоративии  заминҳо  дар се мавзеъ бо ҷалби сармояи берунӣ коркарди заҳбурҳо ба дарозии 4800 метр  ба нақша гирифта шудааст. Коркарди 2000 метри он дар ҳудуди маъмурии Ҷамоати деҳои Сарикиштӣ  дар арафаи анҷомёбӣ қарор дорад.

Аксҳо аз хабарнигори АМИТ «Ховар»