Гулчеҳра Қоҳирова, директори Пажӯҳишгоҳи астрофизикаи АМИТ барандаи ҷоизаи «Ситораҳои Иттиҳод» шуд
ДУШАНБЕ, 12.05.2021 /АМИТ «Ховар»/. Директори Институти астрофизикаи Академияи миллии илмҳои Тоҷикистон (АМИТ) Гулчеҳра Қоҳирова (дар акс) барандаи ҷоизаи солонаи байнидавлатии «Ситораҳои Иттиҳод» гардид. Дар ин бора АМИТ «Ховар» бо истинод ба Фонди байнидавлатии ҳамкории башардӯстонаи кишварҳои узви ИДМ (МФГС) хабар дод.
Ҳамин тариқ, аъзои ҳакамони Ҷоизаи ҳарсолаи байнидавлатии «Ситораҳои Иттиҳод» нуҳ барандаи соли 2020-ро эълон карданд.Аз ҷумла, нависандаи халқии Қазоқистон Олжас Сулаймонов барандаи ин ҷоиза гардид. Инчунин Президенти Академияи миллии илмҳои Қирғизистон Мурат Ҷуматаев ва роҳбари оркестри эстрадӣ-симфонии Ўзбекистон Мансур Тошматов барандагони ҷоизаи бонуфуз шуданд.
Гулчеҳра Қоҳирова директори Пажӯҳишгоҳи астрофизикаи Академияи миллии илмҳои Тоҷикистон буда, дар соҳаи омӯзиши ҷирмҳои осмонӣ кор мекунад. Асарҳои вай ба доираи васеи астрофизикҳои тамоми ҷаҳон маълуманд. Соли 2015 яке аз сайёраҳои хурди системаи офтобӣ ба номи Гулчеҳра Қоҳирова гузошта шуд. Ҳуҷҷати дахлдор дар Ассотсиатсияи умумиҷаҳонии астрофизикҳо, ки марказаш дар Париж аст, ба имзо расид. Ҳоло тақрибан панҷ ҷисми кайҳонӣ (ситораҳо, астероидҳо) ба номи олимони тоҷик гузошта шудаанд. Аз Академияи миллии илмҳо ба АМИТ «Ховар» иттилоъ доданд, ки кормандони академия ҳоло кӯшиш доранд яке аз сайёраҳои хурди системаи Офтобро ба номи Тоҷикистон гузоранд.
Ҷоизаи байнидавлатии “Ситораҳои Иттиҳод» аз ҷониби Шӯрои ҳамкории башардӯстонаи кишварҳои узви ИДМ ва ФБҲБ 21 майи соли 2009 таъсис ёфтааст.
Аз ҳамон вақт инҷониб ин ҷоиза барои дастовардҳои назаррас дар соҳаи гуманитарӣ ҳамасола тақдим карда мешавад.
Ғолибони ҷоизаи мазкур бо диплом, нишони фахрӣ ва шаҳодатнома мукофотонида мешаванд. Маблағи пулии ҷоиза ба 2 миллион рубли русӣ баробар мебошад.
Маросими ботантанаи ҷоизасупорӣ тирамоҳи имсол дар доираи Форуми зиёиёни эҷодӣ ва илмии Ӯзбекистон баргузор мешавад.
АКС аз бойгонӣ
Дар Душанбе дуюмин Синамоҷашнвораи байналмилалӣ «Тоҷи сомон» баргузор мегардад
Дар театри Муҳаммадҷон Қосимов намоишномаи «Ман Таҳминаам…» аз рӯи достони «Шоҳнома» пешниҳод мегардад
Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид
