Дар Душанбе бахшида ба Рӯзи Ваҳдати миллӣ мусобиқаи футболи хурд барои дарёфти «Ҷоми шаҳрдорӣ» ҷамъбаст гардид

ДУШАНБЕ, 25.06.2021 /АМИТ «Ховар»/. Шоми 24 июн дар майдончаҳои Федератсияи Футболи Тоҷикистон мусобиқаи кушоди варзишӣ оид ба футболи хурд байни кормандони мақомоти иҷроияи ҳокимияти давлатии шаҳри Душанбе, ташкилоту муассисаҳои тобеи он ва ноҳияҳои пойтахт барои дарёфти «Ҷоми шаҳрдорӣ» бахшида ба Рӯзи Ваҳдати миллӣ доир гардид.

Дар вохӯриҳои ниҳоӣ дастаҳои мақомоти иҷроияи ҳокимияти давлатии шаҳри Душанбе -2 бо дастаи  Раёсати Вазорати корҳои дохилӣ дар шаҳри Душанбе ва Раёсати Кумитаи давлатии амнияти миллӣ  дар шаҳри Душанбе бо Шабакаҳои гармдиҳии шаҳри Душанбе бо ҳамдигар  бозӣ намуданд. Ҷои якумро дастаи мақомоти иҷроияи ҳокимияти давлатии шаҳри Душанбе-2  сазовор гардида,  Раёсати ВКД дар шаҳри Душанбе ба гирифтани мақоми дуюм ноил шуда,  зинаи сеюм насиби дастаи Шабакаҳои гармдиҳии шаҳри Душанбе гардид.

 Тавре аз Раёсати кор бо мактабҳо ва иншооти варзишии шаҳри Душанбе Раҳматшо Камолов ба  шореҳи варзиши АМИТ «Ховар» Меҳрони Қурбон хабар  доданд, дар ҷамъбасти мусобиқа муовини Раиси шаҳри Душанбе Мавсума Муинӣ, ноиби Федератсияи Футболи Тоҷикистон Алишер Урунов, муовини Раиси Федератсияи футболи шаҳри Душанбе Исо Бафоев, сардори Раёсати кор ҷавонон ва варзиши шаҳри Душанбе Шоҳзод Раҳимзода ва Директори МД « Раёсати кор бо мактабҳо ва иншооти варзишӣ» — и шаҳри Душанбе Раҳматшо Камолов иштирок доштанд.

Дар фарҷоми мусобиқа аз ҷониби муовини Раиси шаҳри Душанбе ба ғолибони ҷои якум –Ҷоми шаҳрдорӣ, медал, диплом, маблағ дар ҳаҷми 13000 сомонӣ, мақоми  дуюм- медал, диплом, 12090 сомонӣ ва зинаи  сеюм- медал, диплом маблағ дар ҳаҷми 10350 сомонӣ тақдим карда шуд. Инчунин ба 5 нафар бозингарони беҳтарин мусобиқа 500 сомонӣ тақдим карда шуд.

Ёдовар менамоем, ки мусобиқаи мазкур дар асоси қарори Раиси шаҳри Душанбе муҳтарам Рустами Эмомалӣ аз 29 май то 24 июни соли 2021 доир гардид. Дар мусобиқа 36 дастаҳои мақомоти иҷроияи ҳокимияти давлатии шаҳри Душанбе, ташкилоту муассисаҳои тобеи он ва ноҳияҳои пойтахт дар 6 гурӯҳ бозӣ намуданд.