ИМРӮЗ –РӮЗИ УМУМИҶАҲОНИИ ВЕЛОСИПЕД. Истифодаи он ба муҳити зист ва ҳифзи саломатии инсон мусоидат мекунад

ДУШАНБЕ, 03.06.2021  /АМИТ  «Ховар»/. Велосипед  дар тӯли ду аср дар мамлакатҳои ҷаҳон истифода бурда мешавад ва яке аз  намудҳои нақлиёти сайёр ва боэътимод буда, аз ҷиҳати экологӣ тоза мебошад. Ҳамзамон истифодаи он ба муҳити зист ва ҳифзи саломатии инсон мусоидат мекунад. Аз ин рӯ соли 2018 Ассамблеяи Генералии Созмони Милали Мутаҳҳид 3-юми июнро ҳамчун  Рӯзи умумиҷаҳонии велосипед  эълон намуд.

Дар Ҷумҳурии Тоҷикистон ҳам шумораи дӯстдорони дучархаронӣ тадриҷан меафзояд, хусусан пас аз пандемия, зеро ҳамагон бар он назаранд, ки велоспорт-ин рӯ овардан ба тарзи ҳаёти солим аст. Ҳамзамон дар мамлакат доир ба дучархаронӣ марафонҳо ва мусобиқаҳо баргузор мегарданд. Ҳамаи инро ба назар гирифта бо ташаббуси Ҳукумати мамлакат дар Ҷумҳурии Тоҷикистон Федератсияи велосипедронӣ таъсис дода шуд.

Тавре аз Федератсияи мазкур ба АМИТ “Ховар” иттилоъ доданд,  Федератсия 14 апрели соли 2010 дар Вазорати адлияи Ҷумҳурии Тоҷикистон  аз қайди давлатӣ гузашта,  ба фаъолият оғоз намуда, бо мактабҳои варзишии маҳорати олии минтақаҳои гуногуни ҷумҳурӣ фаъолияти мунтазами муштарак дошта, дар шаҳри Душанбе, вилоятҳои Суғду Хатлон ва Вилояти Мухтори Кӯҳистони Бадахшон филиалҳо дорад. Ҳамзамон мактабҳои варзишие ҳастанд, ки бо Федератсия ҳамкорӣ менамоянд ва варзиши велосипедронӣ таълим медиҳанд.

Зикр гардид, ки Федератсия имсол баргузории якчанд мусобиқаҳои велосипедронӣ ба нақша гирифтааст, аз ҷумла моҳи июн баргузории мусобиқаи  ҷумҳуриявии велосипедронӣ дар Бохтар, моҳи июл баргузории мусобиқаи ҷумҳуриявии велосипедронӣ  дар шоҳроҳ ва трек дар шаҳри Хуҷанд дар назар аст. Инчунин бахшида ба 30-солагии Истиқлоли Ҷумҳурии  Тоҷикистон баргузории Мусобиқаи ҷумҳуриявии велосипедронӣ дар шоҳроҳи Душанбе-Турсунзода,  мусобиқаи велосипедронӣ дар шоҳроҳи  Хоруғ-Душанбе байни ҳамаи категорияҳо, Мусобиқаи ҷумҳуриявии велосипедронӣ  дар шоҳроҳи вилояти Хатлон, мусобиқа барои Ҷоми Федератсияи велосипедронии Ҷумҳурии Тоҷикистон дар шаҳри Душанбе, Марафони дучархаронӣ бахшида ба Рӯзи Парчами давлатӣ ва даври интихобии Ҷумҳурии Тоҷикистон дар шоҳроҳи шаҳри Тошканд ба нақша гирифта шудааст.

Мавриди зикр аст, ки дар мамлакат аз ҷониби дигар сохторҳову идораҳо низ иқдом гирифта шудааст, ки тарзи ҳаёти солимро тарғиб кунанд. Аз ҷумла, тавре қаблан иттилоъ дода будем, 5 июн дар шаҳри Душанбе  бахшида ба Рӯзи ҷаҳонии ҳифзи муҳити зист марафони велосипедронӣ таҳти  шиори «Велосипед барои табиат» баргузор мегардад ва яке аз ҳадафҳояш тарғиби тарзи ҳаёти солим, ҳифзи муҳити зист аз олудагиҳои нақлиёт арзёбӣ гардида, муҳимияти истифодаи ин намуди нақлиёти аз ҷиҳати экологӣ тозаро инъикос менамояд.

Ногуфта намонад, ки бетараф набудан ба саломатии худ одамонро натанҳо дар Аврупо, балки дар ИДМ низ водор кардааст, ки аз нақлиёти сайёр – дучарха ё худидоракунакҳои барқӣ истифода баранд.

София ШОИК,
АМИТ «Ховар»

АКСҲО аз бойгонӣ