Имрӯз Вазири корҳои хориҷии Тоҷикистон дар нишасти тахассусии Форуми дипломатии Анталия иштирок менамояд

ДУШАНБЕ, 19.06.2021 /АМИТ «Ховар»/. Дирӯз дар шаҳри Анталияи  Туркия нахустин Форуми дипломатии Анталия дар мавзӯи «Дипломатияи навовар: даврони нав, равандҳои нав» ифтитоҳ гардид, ки дар он ҳайати Ҷумҳурии Тоҷикистон бо роҳбарии Вазири корҳои хориҷӣ Сироҷиддин Муҳриддин ширкат варзид.

Тавре АМИТ «Ховра» бо истинод ба Вазорати корҳои хориҷии Тоҷикистон хабар медиҳад, Форуми дипломатии Анталия 18-20 июни 2021 таҳти сарпарастии Президенти Ҷумҳурии Туркия Раҷаб Тайиб Эрдуғон ва бо ташаббуси Вазорати корҳои хориҷии ин кишвар баргузор мегардад.

Дар Форуми мазкур сарони давлатҳо ва ҳукуматҳо, вазирони корҳои хориҷӣ, собиқ роҳбарони давлатҳо ва намояндагони созмонҳои байналмилалӣ иштирок мекунанд.

Дар назар аст, ки Вазири корҳои хориҷии Ҷумҳурии Тоҷикистон имрӯз, 19 июн дар нишасти тахассусии Форуми мазкур зери унвони «Ҳамкориҳои минтақавӣ дар Осиё» иштирок ва суханронӣ намояд.