Дилмурод Давлатзода: «Лоиҳаи Шартнома байни Тоҷикистон ва Россия дар бораи ҳамкорӣ дар соҳаи таъмини нафақа дар баррасӣ қарор дорад»
ДУШАНБЕ, 21.07.2021 /АМИТ «Ховар»/. Агентии суғуртаи иҷтимоӣ ва нафақа ҳамкориро бо Федератсияи Россия густариш додааст. Дар ин давра омилҳои баҳсноки лоиҳаи Шартнома байни Россия ва Тоҷикистон дар бораи ҳамкорӣ дар соҳаи таъмини нафақа тариқи баргузории муҳокимаҳо дар шакли видеоконфронс бо ҷониби Федератсияи Россия бартараф карда шуданд. Лоиҳаи мазкур дар мувофиқа бо Вазорати корҳои хориҷии мамлакат барои баррасӣ ба Ҳукумати ҷумҳурӣ пешниҳод гардидааст.
Дар ин бора имрӯз зимни нишасти матбуотӣ директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Дилмурод Давлатзода ба намояндагони воситаҳои ахбори омма иттилоъ дод.
Ба зикри Дилмурод Давлатзода, дар Ҷумҳурии Тоҷикистон шумораи умумии нафақагирон 744 ҳазору 785 нафарро ташкил медиҳад, ки нисбат ба ҳамин давраи соли гузашта 22097 нафар ва ё ин ки 3,1 фоиз зиёд мебошад.
Яке аз самтҳои муҳими фаъолияти Агентии суғуртаи иҷтимоӣ ва нафақа- ин рушди низоми қонунгузории соҳаи суғуртаи иҷтимоӣ ва нафақа буда, пайваста дар ин самт тадбирҳои дахлдор андешида мешаванд. Ин аст, ки дар шашмоҳаи якуми соли равон дар доираи идомаи ислоҳоти соҳа бо мақсади такмил додани низоми таъминоти нафақа лоиҳаи Қонуни Ҷумҳурии Тоҷикистон «Дар бораи нафақаҳои суғуртавӣ ва давлатӣ», лоиҳаи Қонуни Ҷумҳурии Тоҷикистон «Дар бораи суғуртаи давлатии иҷтимоӣ», лоиҳаи Қонуни Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи суғуртаи ҳатмии нафақавии касбӣ»» омода гардиданд. Лоиҳаҳо бо вазорату идораҳои дахлдор мувофиқа шуда, ба баррасии Ҳукумати мамлакат пешниҳод ва 30 июни соли равон дар Маҷлиси Ҳукумат қобили қабул дониста шуданд.
«Ҳоло Агентии суғуртаи иҷтимоӣ ва нафақа бо мақсади рушди ҳамкорӣ дар самти таъминоти нафақа ва суғуртаи иҷтимоӣ ҳамкории густуртаро бо ҷумҳуриҳои Қирғизистон ва Ӯзбекистон ба роҳ мондааст. Дар доираи сафари расмии Президенти Ҷумҳурии Қирғизистон ба Тоҷикистон байни Вазорати тандурустӣ ва рушди иҷтимоии Қирғизистон ва Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Созишнома оид ба ҳамкорӣ дар соҳаи таъминоти нафақа ва суғуртаи иҷтимоӣ ба имзо расонида шуд.
Инчунин дар арафаи ташрифи Президенти Ҷумҳурии Ӯзбекистон ба Тоҷикистон байни Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон ва Фонди нафақаи ғайрибуҷетии назди Вазорати молияи Ҷумҳурии Ӯзбекистон Созишнома ба имзо расонида шуд.
Дар Бадахшон омодагӣ ба давраи тирамоҳу зимистон ва Форуми байналмилалии «Помир-Инвест 2022» баррасӣ гардид
Иброҳим Мирзозода аз нав Раиси Кумитаи иҷроияи ҲХДТ дар шаҳри Душанбе интихоб гардид
Хизматчиёни давлатии Тоҷикистон барои таҳсили дусола ба донишгоҳҳои бонуфузи Ҷопон фиристода мешаванд
Дар ноҳияи Фирдавсӣ аз ҷониби ҲХДТ номзад ба вакилии Маҷлиси вакилони халқи шаҳри Душанбе дар ҳавзаи интихоботии №62 пешбарӣ шуд
Беш аз 100 нафар маъюбони шаҳру ноҳияҳои Суғд соҳиби аробача гардиданд
ДУ ПОЙ ДАР ЛОЙ. Камол Насрулло таассуб ва хурофотро аз бемориҳои дерину куҳансоле номид, ки бархе аз мардуми мо ба он гирифтор аст
Раиси ВМКБ Алишер Мирзонабот бо мақсади шиносоӣ бо рушди инфрасохтор ба водии Бартанги Рӯшон сафари корӣ намуд
ВИРУСОЛОГҲО ДАР БОРАИ ИМКОНИЯТ ВА МУҲЛАТИ МАВҶИ НАВИ COVID-19 ДАР РУСИЯ. Вазири тандурустии Тоҷикистон мавҷуд будан ё набудани омилҳои воридшавии коронавирусро ба кишвари мо шарҳ дод
Ба Сарраёсати ҳифзи муҳити зист дар вилояти Хатлон озмоишгоҳи сайёри экологӣ дастрас гардид
ЭҲТИЁТ БОШЕД, ФАЪОЛНОКИИ ОФТОБӢ! Даври баландтарини он ба солҳои 2022-2023 рост меояд
Дар Душанбе ҷаласаи Комиссияи сетарафаи танзими муносибатҳои иҷтимоию меҳнатӣ баргузор гардид
Борони кӯтоҳмуддат ба чор қитъаи замини наздиҳавлигии сокинони ноҳияи Лахш зарар расонид
