Террористон метавонанд зери ниқоби гуреза ба Тоҷикистон ворид шаванд

Июль 27, 2021 15:26

ДУШАНБЕ, 27.07.2021 /АМИТ «Ховар»/. Тоҷикистон омода аст гурезаҳои афғонро дар робита ба шиддат гирифтани вазъи низомӣ-сиёсии кишвари ҳамсоя дар пасманзари хуруҷи неруҳои амрикоӣ қабул кунад, вале мақомот ҳанӯз шумораи дақиқи онҳоро ном бурда наметавонанд. Дар ин бора имрӯз Вазири корҳои хориҷии Тоҷикистон Сироҷиддин Муҳриддин зимни нишасти матбуотӣ изҳор дошт.

«Мо бояд барои гурезагон шароити муайян фароҳам орем, то коронавирус паҳн нашавад, аз ин рӯ, мо ҳанӯз омода нестем, ки шумораи дақиқи гурезаҳоеро, ки метавонем қабул намоем, номбар кунем», — гуфт ӯ.

Илова бар ин, ба гуфтаи вазир, аъзои созмонҳои террористӣ метавонанд зери ниқоби паноҳандагон вориди Тоҷикистон шаванд. Ба гуфтаи ӯ, дар кишвар метавонанд намояндагони гурӯҳҳои дар Тоҷикистон мамнӯъ, ба мисли «Ал-Қоида», «Ансоруллоҳ» ва «Ҳаракати Исломии Туркистони Шарқӣ» пайдо шаванд.

Бояд тазаккур дод, ки 23 июл муовини раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Эмомалӣ Иброҳимзода низ дар бораи омодагии Тоҷикистон ба қабули шаҳрвандони Афғонистон гуфта буд. Ба гуфтаи ӯ, ҷумҳурӣ омода аст дар қаламрави худ тақрибан 100 ҳазор гурезаро ҷойгир кунад. Онҳоро метавонанд дар машқгоҳҳои таълимии Вазорати мудофиаи Тоҷикистон, воқеъ дар наздикии марз бо Афғонистон ҷойгир кунанд.

Иброҳимзода таъкид кард, ки мақомот «иқтидори кишварро барои қабули шаҳрвандони Афғонистон бо созмонҳои байналмилалӣ меомӯзанд». Дар ҷумҳурӣ барои гурезаҳо лагерҳои махсус омода мекунанд.

«Тоҷикистон метавонад гурезаҳоро аз Афғонистон қабул кунад, — гуфт директори Маркази тадқиқоти стратегии назди Президенти Ҷумҳурии Тоҷикистон Хуршед Зиёӣ дирӯз, 26 июл. — Аммо, имконоти ҷумҳурӣ дар ин самт номаҳдуд нестанд».

Ба ақидаи ӯ, агар сенарияи Сурия такрор шавад, гурезаҳои афғон на танҳо ба Тоҷикистон ва дигар ҷумҳуриҳои Осиёи Марказӣ, балки ба Чин, кишварҳои Иттиҳоди Аврупо, Русия ва ИМА низ мераванд.

Ёдовар мешавем, ки дар Афғонистон муқовимати неруҳои ҳукуматӣ ва аъзои ҳаракати ифротии дар Тоҷикистон мамнӯи «Толибон» идома дорад. Сарбозон ва шаҳрвандон борҳо аз дасти ҷангиён ба қаламрави Тоҷикистон фирор кардаанд. Тавре АМИТ «Ховар» қаблан хабар дода буд, моҳи июл ҷумҳурӣ беш аз ҳазор нафар шаҳрвандони афғонро қабул намуд, ки бинобар муноқишаи мусаллаҳонаи неруҳои ҳукуматӣ ва аъзои ҳаракати ифротии «Толибон» аз Афғонистон фирор карда буданд. Ба гурезагон манзили муваққатӣ, ёрии тиббӣ, се маротиба хӯроки гарм, рахти хоб ва ашёи рӯзгор дода шуд.

Э. Иброҳимзода гуфт, ки афғонҳо бо ёздаҳ парвози чартерӣ ба Кобул ва Мазори Шариф баргаштанд.

 

АКС аз АМИТ «Ховар»

Июль 27, 2021 15:26

Хабарҳои дигари ин бахш

Намояндаи Тоҷикистон дар чорабинӣ оид ба маблағгузории миллӣ барои расидан ба Ҳадафҳои Рушди Устувор иштирок намуд
Ҷонибек Ҳикмат дар чорабинӣ бахшида ба Рӯзи байналмилалии «ҷаҳони бе партов» иштирок намуд
Дар қароргоҳи Созмони Милали Муттаҳид бахшида ба таҷлили ҷашни Наврӯзи байналмилалӣ ҳамоиши тантанавӣ доир гашт
Деннис Фрэнсис саҳми Тоҷикистонро дар пешбарии масъалаҳои марбут ба об баланд арзёбӣ намуд
Дар Ню-Йорк аҳаммияти фаъолияти Раванди оби Душанбе баррасӣ гардид
Дар шаҳри Остона ҷашни байналмилалии Наврӯз таҷлил гардид
Вазири корҳои хориҷии Тоҷикистон дар Конфронс ба муносибати Рӯзи ҷаҳонии об иштирок намуд
Тоҷикистон ва Туркия муносибатҳои дуҷонибаро дар самтҳои сиёсӣ, иқтисодӣ ва сармоягузорӣ баррасӣ намуданд
Дар шаҳри Москва Наврӯзи байналмилалиро таҷлил намуданд
Ҷашни байналмилалии Наврӯзро дар Ашқобод бошукуҳ таҷлил намуданд
Дар Берлин ҷашни байналмилалии Наврӯзро таҷлил намуданд
Дар Душанбе фаъолияти Бонки аврупоии таҷдид ва рушд дар Тоҷикистон баррасӣ шуд