Ба истиқболи 30-солагии Истиқлоли давлатӣ ҷилди 20-уми силсиламаҷмӯаи Пешвои миллат — «Истиқлолияти Тоҷикистон ва эҳёи миллат» ба нашр расид

ДУШАНБЕ, 28.08.2021 /АМИТ «Ховар»/. Ба истиқболи сазовори ҷашни бузурги миллӣ- 30-солагии Истиқлоли давлатии Ҷумҳурии Тоҷикистон аз ҷониби Муассисаи нашриявии «Ирфон» ҷилди 20-уми силсиламаҷмӯаи Пешвои миллат- «Истиқлолияти Тоҷикистон ва эҳёи миллат» дар сатҳи баланд аз чоп баромад. Ин маҷмӯа матни суханрониҳо, маърӯзаҳо, мусоҳибаҳо, изҳорот, муроҷиатномаҳо ва паёмҳои табрикотии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро аз 15 январ то 31 декабри соли 2020 дар бар мегирад, хабар доданд ба АМИТ «Ховар» аз нашриёти «Ирфон».

Бояд гуфт, ки Муассисаи нашриявии «Ирфон» шурӯъ аз соли 2002 силсиламаҷмӯаи «Истиқлолияти Тоҷикистон ва эҳёи миллат» ва аз соли 2006 тарҷумаи русии он- «Независимость Таджикистана и возрождение нации»-ро оғоз намуд, ки то имрӯз 20 ҷилди он бо забони тоҷикӣ ва 18 ҷилд бо забони русӣ ба табъ расидаанд. Ҳамзамон барои осон гардидани раванди таҳқиқ бори аввал дар ҷилди 20-и силсиламаҷмӯа мураттибон се навъи кумакфеҳристи библиографӣ, аз қабили феҳристи мавзӯъҳо, феҳристи номҳои ҷуғрофӣ ва феҳристи ашхосро дар шакли васеъ ва мукаммал ҷой додаанд, ки истифодаи босамари ин кумакфеҳристҳо барои пажӯҳандагони риштаҳои гуногуни илм муфид хоҳад буд.

Зимнан бояд гуфт, ки ин силсиламаҷмӯа бо теъдоди 1000 нусха бо сатҳ ва сифати баланди полиграфӣ ба нашр расидааст. Мувофиқи таҳлилҳои амиқ дар миқёси Ҷумҳурии Тоҷикистон беш аз шаш ҳазор китобхона фаъолият менамоянд, ки бо чунин теъдод ба нашр расидани ин китоби меҳварӣ дар даврони ҷаҳонишавӣ ва гуфтугӯи тамаддунҳо, ки хатари мағзшӯӣ ва таҳмил кардани забону фарҳанг рӯи миллати дигарро чун пайомад ба бор меорад, ҳоло ҳам қаноатмандкунанда нест.

Тавре зимни суҳбат бо хабарнигори АМИТ «Ховар» директори Муассисаи нашриявии «Ирфон», номзади илмҳои педагогӣ, дотсент Қурбон Ғуломзода иброз дошт, дар ин давраи ҳассосе, ки ҷангҳои фарҳангӣ дар фазои иттилоотӣ ба шиддат сурат гирифта истодаанд, бо теъдоди зиёд нашр намудани китоби Президенти Тоҷикистон муҳтарам Эмомалӣ Раҳмон- «Истиқлолияти Тоҷикистон ва эҳёи миллат», ки тарғибкунандаи рӯҳи истиқлолу озодӣ, ваҳдату ягонагӣ, ормонҳои миллӣ, ҳимоя аз асолати фарҳангӣ ва тамомияти арзист, айни муддао хоҳад буд. Таҳлилҳо нишон медиҳанд, ки дар мамолики хориҷ китобҳое, ки дар роҳи ҳимояи манофеи миллӣ навишта мешаванд, бо теъдоди хеле зиёд ва аз ҷиҳати полиграфӣ дар сатҳи баланд нашр гардида, дастраси хонандагон мешаванд ва ҳамзамон  бо инобати талаботи ҷомеа пайваста бознашр мегарданд.

Қурбон Ғуломзода пешниҳод менамояд, ки хуб мешуд, силсиламаҷмӯаи Асосгузори сулҳу ваҳдати миллӣ –Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон — «Истиқлолияти Тоҷикистон ва эҳёи миллат» бо теъдоди муайян бознашр гардида, ба китобхонаҳои вазорату идораҳо, шаҳру ноҳияҳои ҷумҳурӣ, новобаста аз шакли моликият дастрас карда шавад. Агар ин кор воқеъбинона сурат бигирад, барои боз ҳам мустаҳкам гардидани истиқлолу ваҳдати комили миллӣ ва тарғибу ташвиқи асолати фарҳангӣ миёни ҷавонон нақши бориз хоҳад гузошт.