ТАСС: Неруҳои муқовимати Панҷшер ҳамлаи толибонро ба яке аз гузаргоҳҳои аввалин зада гардонданд

Август 31, 2021 11:40

ДУШАНБЕ, 31.08.2021 / АМИТ «Ховар» /. Неруҳои муқовимати миллӣ дармузофоти Панҷшер, ки ба ҳаракати ифротгарои «Толибон» итоат накарданд, ҳамлаи ҷангиёнро ба яке аз гузаргоҳҳои аввалини қисми ғарбии ин минтақа зада гардонданд. Тавре АМИТ «Ховар» иттилоъ медиҳад, дар ин бора дирӯз як манбаъ дар ин музофот тавассути телефон ба ТАСС хабар додааст.

«Ин бегоҳ толибон мехостанд тавассути яке аз посгоҳҳои самти ғарбӣ ба Панҷшер ворид шаванд, аммо ҳамлаи онҳо баргардонида шуд. Дар миёни толибон кушта ва захмиҳо ҳастанд. Ҳоло вазъ дар минтақа ором аст», — гуфтааст ҳамсуҳбати агентӣ.

Ба гуфтаи ӯ, «Толибон»* вақтҳои охир неруҳои худро дар атрофи Панҷшер муттаҳид мекунанд. «Раванди музокирот натиҷае намедиҳад. Ба эҳтимоли зиёд толибон ба амалиёти ҷангӣ омодагӣ мебинанд ва як навъ разведкаи ҷангӣ мегузаронанд», — афзудааст манбаъ.

Рӯзи чоршанбе Абдул Ҳафизи Мансур, ки Панҷшерро дар музокирот бо ифротгароён намояндагӣ мекунад, дар бораи аввалин музокироти мустақими намояндагони неруҳои муқовимат бо ҳайати «Толибон»* дар шаҳри Чарикар (маркази маъмурии музофоти Парвон) иттилоъ дод.Ба гуфтаи ӯ, ҷонибҳо ба мувофиқа расиданд, ки «ба хотири ҷилавгирӣ аз задухӯрди низомӣ муколамаро дар бораи сулҳ идома медиҳанд».

Намояндаи неруҳои муқовимати Панҷшер Фаҳим Даштӣ ҳафтаи гузашта ба хабаргузории ТАСС гуфта буд, ки масъалаи расидан ба созиш бо ифротгароён дар бораи қатъи амалиёт дар шимоли Афғонистон ҳоло ҳам баррасӣ мешавад. Пештар ӯ зикр карда буд, минтақае, ки ба толибон итоат накардааст, мехоҳад ба ташкили мақомоти воқеан фарогири давлатӣ ноил шавад.

Вазъ дар кишвар

Ҳаракати «Толибон»* пас аз эълони ИМА дар бораи азми хуруҷи неруҳои низомии худ аз Афғонистон амалиёти густурдаро барои назорат бар Афғонистон оғоз карданд. 15 август президент Ашраф Ғанӣ истеъфо дода, кишварро тарк кард ва толибон бидуни ҷанг вориди Кобул шуданд.

Неруҳое, ки бо қудрати ифротгароён розӣ нестанд, дар Панҷшер муқовимат ташкил карданд, ки ба он Аҳмад Масъуд, писари фармондеҳи машҳури саҳроӣ Аҳмадшоҳи Масъуд (1953-2001) раҳбарӣ мекунад. Ноиби президенти пешин Амруллоҳ Солеҳ, ки худро иҷрокунандаи вазифаи сарвари давлат эълон кард, даъват намуд, ки ӯро дастгирӣ кунанд.

АКС: © AP Photo/Jalaluddin Sekandar

*«Толибон» ҳаракатест, ки дар Тоҷикистон, Русия ва якчанд  давлати дигар мамнӯъ аст.

Август 31, 2021 11:40

Хабарҳои дигари ин бахш

Судяҳои Суди Олии Тоҷикистон дар форуми байналмилалӣ иштирок намуданд
Ҳайати Тоҷикистон дар ҷаласаи раисони судҳои олии давлатҳои аъзои Созмони ҳамкории Шанхай иштирок намуд
Оид ба татбиқи барномаҳои давлатии Тоҷикистон дар пешгирии экстремизм ва терроризм конфронси ҷумҳуриявӣ доир шуд
Дар Душанбе оид ба истифодаи технологияҳои ҳастаӣ ва бехатарии радиатсионӣ конференсияи байналмилалӣ доир шуд
Тоҷикистон ва Эрон нақша доранд ҳамкориро дар самти мубориза бо ҷинояткории муташаккили фаромиллӣ густариш диҳанд
Байни Тоҷикистон ва Қирғизистон оид ба рафъи ҳолатҳои фавқулода Ёддошти тафоҳум ба имзо расид
Дар Душанбе масъалаи арзёбии фаврӣ ва ҳамоҳангсозии ҳолатҳои фавқулода баррасӣ гардид
Вохӯрии дуюми котибони шуроҳои амнияти давлатҳои Осиёи Марказӣ дар Самарқанд баргузор шуд
Бо истифода аз барномаи «Нозири минтақавии ман» шаҳрвандон метавонанд нозири минтақавии худро шиносанд
ПУРСИДЕД, ҶАВОБ МЕДИҲЕМ. Киҳо хуқуқи дар сафи Қувваҳои Мусаллаҳи Ҷумҳурии Тоҷикистон хизмат карданро доранд?
Дар шаҳри Бӯстон нақшаи даъвати баҳорӣ ба сафи Қувваҳои Мусаллаҳ иҷро гардид
Дар Тоҷикистон нақшаи даъвати баҳорӣ ба сафи Артиши миллӣ беш аз 80 фоиз иҷро шуд