Ҷамолиддин Нуралиев ва Бридҷит Уокер ҳамкории Бонки миллӣ бо Сафорати Амрикоро баррасӣ намуданд

Октябрь 12, 2021 16:34

ДУШАНБЕ, 12.10.2021 /АМИТ «Ховар»/. Муовини якуми Раиси Бонки миллии Тоҷикистон Ҷамолиддин Нуралиев муовини роҳбари Сафорати Иёлоти  Муттаҳидаи Амрико дар Ҷумҳурии Тоҷикистон Бридҷит Уокерро, ки барои анҷоми мулоқоти арзи адаб ташриф овард, ба ҳузур пазируфт. Дар ин бора ба АМИТ «Ховар» аз Бонки миллии Тоҷикистон иттилоъ доданд.

Ҷамолиддин Нуралиев дипломати амрикоиро бо вазъи макроиқтисодӣ дар кишвар ва низоми бонкию суғурта шинос намуда, таъкид дошт, ки дар шароити душвори рафъи пайомадҳои манфии пандемияи COVID-19, ки иқтисодиёти ҷаҳон паси сар менамояд, Ҷумҳурии Тоҷикистон дар натиҷаи андешидани тадбирҳои дурусти ҳукумати кишвар тавонист таъсири манфии пандемияи COVID-19 ба иқтисодиётро ба таври назаррас коҳиш диҳад.

«Бонки миллии Тоҷикистон ба таври фаврӣ нақшаи коҳиши таъсири пандемияи COVID-19 ба низоми бонкӣ ва суғуртаро таҳия намуда, бо ин мақсад ба ташкилоти қарзии молиявӣ якчанд имтиёзҳо фароҳам овард. Дар натиҷа, ташкилоти қарзии молиявӣ имкон пайдо карданд, ки фаъолияти муназзами худро идома дода, соли молиявиро бо нишондиҳандаҳои мусбат ҷамъбаст намоянд»,-афзуд Ҷамолиддин Нуралиев

Бридҷит Уокер зикр намуд, ки воқеан пандемияи COVID-19 ба тамоми соҳаҳо, аз ҷумла иқтисодиёт, иҷтимоиёт, тандурустӣ, маориф ва нақлиёти ҷаҳонӣ таъсири манфӣ расонид, аммо дар чунин шароити мураккаб Тоҷикистон тавонист вазъи иқтисодии кишварро муътадил нигоҳ дорад.

Дар идомаи мулоқот Ҷамолиддин Нуралиев ба таҳлили низоми бонкӣ пардохта, беҳ гардидани вазъи низоми бонкӣ ва кам шудани ҳиссаи қарзҳои ғайрифаъол дар сандуқи қарзиро самараи татбиқи ислоҳоти фарогир маънидод кард ва ҳавасмандии худро аз барқарор кардани суратҳисобҳои муросилотии бонкҳои кишвар дар бонкҳои хориҷӣ иброз намуд.

Бридҷит Уокер нақши Бонки миллии Тоҷикистонро дар таҳияву амалигардонии ислоҳоти низоми бонкӣ муассир арзёбӣ намуда, омодагии худро ҷиҳати тақвияти ҳамкории минбаъда барои рушди низоми бонкии ду кишвар иброз дошт.

Таъкид гардид, ки ҳоло БМТ дар самти муқовимат ба қонунигардонии (расмикунонии) даромадҳои бо роҳи ҷиноят ба дастоварда, маблағгузории терроризм ва маблағгузории паҳнкунии силоҳи қатли ом, идоракунии захираҳои байналмилалӣ ва сиёсати қурби асъор ва рушди бозори суғуртаи кишвар бо Сафорати ИМА дар Тоҷикистон ҳамкории судманд ба роҳ мондааст ва дар оянда хостори тавсеаи ҳамкории мазкур мебошад.

Ҳамчунин дар идомаи мулоқот имконияти рушди устувори бозори суғурта дар Ҷумҳурии Тоҷикистон, роҳандозии якчанд  тадбирҳо, аз қабили фароҳам овардани заминаи мусоиди меъёрии ҳуқуқӣ, беҳтар гардидани идораи захираҳои байналмилалӣ ва афзудани он дар 5 соли охир махсус зикр гардид.

Бридҷит Уокер дар робита ба рушди бозори суғурта дар Ҷумҳурии Тоҷикистон гуфт, ки Сафорати Амрико дар Тоҷикистон имконияти дастгирии техникии ислоҳоти ҷараёндошта ва таҳияи мукаммали заминаи меъёрии ҳуқуқии соҳаро баррасӣ хоҳад намуд.

Мавсуф иброз дошт, ки ислоҳоти татбиқшаванда дар ояндаи дарозмуҳлат самараи худро хоҳад дод ва Сафорати Амрико барои ҳамкорӣ ҷиҳати рушди низоми бонкии Тоҷикистон омода аст.

 Аксҳо аз БМТ

Октябрь 12, 2021 16:34

Хабарҳои дигари ин бахш

Сарвазири Тоҷикистон бо Директори генералии Бонки Осиёии рушд оид ба Осиёи Марказӣ ва Осиёи Ғарбӣ мулоқот намуд
Дар Душанбе масоили самаранокии низоми идоракунии давлатӣ ва волоияти қонун баррасӣ шуд
ҚУРБИ АСЪОР: 1 евро аз 13.9345 то 13.0500 сомонӣ муқаррар шудааст
Миёни Ҳукумати Ҷумҳурии Тоҷикистон ва Корпоратсияи байналмилалии молиявӣ Созишномаи ҳамкорӣ ба имзо расид
Дар Тоҷикистон истеҳсоли картошка нисбат ба ҳамин давраи соли гузашта 144 ҳазор тонна зиёд гардидааст
МУЖДАИ ЗАФАР. Кишоварзони ноҳияи Кӯшониёни вилояти Хатлон нақшаи истеҳсоли пахтаро иҷро намуданд
ҚУРБИ АСЪОР: дар муассиcаҳои ташкилоти қарзии Тоҷикистон 1 евро аз 12.9534 то 13.0500 сомонӣ муқаррар шудааст
Иля Федоров, директори департаменти Вазорати рушди иқтисоди ФР: Иқтидори тиҷоратии Русия ва Тоҷикистон ба тавре ки мебояд, истифода нашудааст
ИМРӮЗ — РӮЗИ БАЙНАЛМИЛАЛИИ САРФАИ ЭНЕРГИЯ. Коршиноси АМИТ «Ховар» мегӯяд, ки чаро он ба Тоҷикистон ин қадар зарур аст
Дар Душанбе Муколамаи миллии сатҳи баланд оид ба низоми озуқаворӣ дар Ҷумҳурии Тоҷикистон баргузор шуд
ҚУРБИ АСЪОР: 1 доллари ИМА аз 11.2965 то 11.3300 сомонӣ муқаррар шудааст
Вазири кишоварзии Тоҷикистон дар ноҳияи Мастчоҳ бо ҷараёни ҷамъоварии пахта ва коркарди он шинос гардид