Дар ноҳияи Данғара корхонаи истеҳсоли маҳсулоти саноатӣ сохта мешавад

ДУШАНБЕ, 12.07.2025 /АМИТ «Ховар»/. Байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди «КМ Муосир» оид ба сохтмон ва баистифодадиҳии корхонаи истеҳсоли маҳсулоти саноатӣ дар ҳудуди ноҳияи Данғара Созишномаи сармоягузорӣ ба имзо расонида шуд. Дар ин хусус АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.

Ҳадафи имзои Созишномаи сармоягузорӣ ин тавассути ҷалби сармоя ба роҳ мондани истеҳсоли маҳсулоти воридотивазкунанда ва дар ин замина таъмини мунтазами корхонаҳои ватании дар соҳаи саноат фаъолияткунанда бо маҳсулоти тайёр арзёбӣ мегардад. Дар ин замина сармоягузор уҳдадорӣ гирифтааст, ки барои бунёди корхонаи нав ва таҷдиди истеҳсолоти марҳилаи аввал 80 миллион сомонӣ сармоягузорӣ намуда, беш аз 50 нафарро бо ҷойҳои нави кор таъмин намояд.

Ин иқдом дар самти татбиқи яке аз чор ҳадафи стратегии Ҳукумати ҷумҳурӣ-саноатикунонии босуръати мамлакат мусоидат менамояд.

Иброз гардид, ки қаблан аз ҷониби сармоягузор корхонаи истеҳсоли моддаҳои таркандаи эмулсионии саноатӣ дар ноҳияи Данғара сохта ба истифода шудааст.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон