Дар нуҳ моҳи соли равон 9374 ҳолати вайронкунии қонунгузории замин ошкор карда шудааст

Октябрь 12, 2021 16:10

ДУШАНБЕ, 12.10.2021 /АМИТ «Ховар»/. Аз ҷониби Кумитаи давлатии идораи замин ва геодезии Ҷумҳурии Тоҷикистон дар нуҳ моҳи соли равон 9 ҳазору 374 ҳолати вайронкунии қонунгузории замин ошкор карда шуда, барои бартараф намудани ин ҳолатҳо 8 ҳазору 746 дастур ва нисбат ба 8 ҳазору 343 ҳолат парвандаи маъмурӣ тартиб дода шуд. Барои додани баҳои ҳуқуқӣ 737 мавод ба прокуратура, 469 мавод барои ба таври маҷбурӣ ситонидани маблағи ҷаримаҳо ба Хадамоти иҷрои назди Ҳукумати Ҷумҳурии Тоҷикистон ирсол карда шуда, 6 ҳазору 990 ҳолати вайронкунии қонунгузории замин дар маҳал бартараф гардид.

Дар ин бора дар ҷаласаи навбатии ҳайати мушовараи Кумитаи давлатии идораи замин ва геодезӣ оид ба ҷамъбасти натиҷаҳои фаъолият дар нуҳ моҳи соли равон, ки 11 октябр дар шаҳри Кӯлоб баргузор шуд, ибрози назар карда шуд.

Тавре аз Кумитаи мазкур ба АМИТ «Ховар» хабар доданд, дар ҷаласа муовини раиси Кумитаи давлатии идораи замин ва геодезӣ Зикриё Абдуллозода оид ба фаъолияти Кумитаи давлатии идораи замин ва геодезӣ, мақомоти он дар маҳалҳо, муассисаҳои системаи Кумитаи давлатӣ дар нуҳ моҳи соли 2021 ҳисобот дода, зикр кард, ки дар давраи ҳисоботӣ аз ҷониби Кумитаи давлатӣ ва мақомоти маҳаллии он ҷиҳати истифодаи самараноку оқилонаи заминҳои таъйиноти кишоварзӣ ва пешгирии ҳуқуқвайронкуниҳо оид ба истифодаи замин вобаста ба дурнамои кишти зироати кишоварзӣ, бунёди боғу токзори нав дар заминҳои лалмӣ, чарогоҳҳо, ки бо намии табиӣ таъмин мебошанд ва заминҳои дар кишоварзӣ истифоданашаванда тадбирҳои зарурӣ андешида шуданд.

Зикр шуд, ки ҷиҳати истиқболи сазовори ҷашни 30-солагии Истиқлолияти давлатӣ аз тарафи Кумитаи давлатии идораи замин ва геодезӣ корҳои муайян ба сомон расонида шуда, биноҳои маъмурии нави кумитаҳои идораи замин ва корхонаҳои давлатии фаръии «Бақайдгирии молу мулки ғайриманқул» дар шаҳру ноҳияҳои Ваҳдат, Турсунзода, Ҳисор Восеъ, Данғара, Деваштич ва А.Ҷомӣ мавриди баҳрабардорӣ қарор гирифтанд.

Дар баробари ин, давоми се соли охир биноҳои маъмурии кумитаи идораи замин ва КДФ «Бақайдгирии молу мулки ғайриманқул» дар ноҳияи Рӯшон, Ҷ.Расулов, Муъминобод ва Ишкошим навсозӣ ва ба истифода супорида шуданд.

Айни ҳол дар шаҳри Кӯлоб бинои маъмурии чорошёна бунёд шуда истодааст. Илова бар ин сохтмони биноҳои нави маъмурӣ дар шаҳру ноҳияҳои Хуҷанд, Роштқалъа, Ш.Шоҳин, Айнӣ, Варзоб ва Хуросон бомаром идома дорад.

АКС аз Кумитаи давлатии идораи замин ва геодезии ҶТ

Октябрь 12, 2021 16:10

Хабарҳои дигари ин бахш

Дар ноҳияи Ховалинг 500 гектар замин обёрӣ ва 20 гектар замини нав ба гардиши кишоварзӣ ворид гардид
Тоҷикистон ва Қатар ҳамкориро дар соҳаи сайёҳӣ ва муаррифии ҳунарҳои мардумӣ вусъат мебахшанд
Сарвазири Тоҷикистон бо Директори генералии Бонки Осиёии рушд оид ба Осиёи Марказӣ ва Осиёи Ғарбӣ мулоқот намуд
Дар Душанбе масоили самаранокии низоми идоракунии давлатӣ ва волоияти қонун баррасӣ шуд
Миёни Ҳукумати Ҷумҳурии Тоҷикистон ва Корпоратсияи байналмилалии молиявӣ Созишномаи ҳамкорӣ ба имзо расид
Дар Тоҷикистон истеҳсоли картошка нисбат ба ҳамин давраи соли гузашта 144 ҳазор тонна зиёд гардидааст
МУЖДАИ ЗАФАР. Кишоварзони ноҳияи Кӯшониёни вилояти Хатлон нақшаи истеҳсоли пахтаро иҷро намуданд
Иля Федоров, директори департаменти Вазорати рушди иқтисоди ФР: Иқтидори тиҷоратии Русия ва Тоҷикистон ба тавре ки мебояд, истифода нашудааст
ИМРӮЗ — РӮЗИ БАЙНАЛМИЛАЛИИ САРФАИ ЭНЕРГИЯ. Коршиноси АМИТ «Ховар» мегӯяд, ки чаро он ба Тоҷикистон ин қадар зарур аст
Дар Душанбе Муколамаи миллии сатҳи баланд оид ба низоми озуқаворӣ дар Ҷумҳурии Тоҷикистон баргузор шуд
Вазири кишоварзии Тоҷикистон дар ноҳияи Мастчоҳ бо ҷараёни ҷамъоварии пахта ва коркарди он шинос гардид
Таҳкими ҳамкории Тоҷикистон ва Туркия дар бахши ҳифзи муҳити зист дар Глазго баррасӣ шуд