ФУТБОЛ. Дастаи мунтахаби Тоҷикистон (U-23) дастаи Лубнонро мағлуб намуд

ДУШАНБЕ, 26.10.2021 /АМИТ «Ховар»/. Дар шаҳри Душанбе Мусобиқаи интихобии Ҷоми Осиё-2022 миёни футболбозони то 23-сола дар гурӯҳи «В» оғоз ёфт. Дастаи мунтахаби Тоҷикистон (U-23) бо роҳбарии сармураббӣ Мубин Эргашев дар даври аввал бар дастаи Лубнон бо ҳисоби 1:0 ғалаба кард. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Голи ягонаи дидорро ҳимоятгари дастаи “Истиқлол”-и Душанбе Ваҳдат Ҳаннонов дар дақиқаи 87-ум зад.

Дар бозии дигари гурӯҳ дастаи мунтахаби олимпии Эрон ба дарвозаи Непал 4 голи беҷавоб зад.

28 октябр дар даври дуюми мусобиқаи интихобии Ҷоми Осиё-2022 дастаи олимпии Тоҷикистон бо дастаи мунтахаби Непал бозӣ мекунад. Дидори дастаҳо дар Варзишгоҳи марказии ҷумҳуриявӣ доир мегардад.

Бозиҳои оянда:

Даври 2-юм

28 октябр (панҷшанбе)

16:00. Лубнон – Эрон

19:00. Непал – ТОҶИКИСТОН

Даври 3-юм 

31 октябр (якшанбе)

16:00. Лубнон – Непал

19:00. Эрон – ТОҶИКИСТОН

АКС аз ФФТ