ХАБАРИ ФАВРӢ! Дар музофоти Кундузи* Афғонистон бар асари таркиш дар масҷиди шиаҳо беш аз 100 нафар кушта шуданд

ДУШАНБЕ, 08.10.2021 /АМИТ «Ховар»/. Имрӯз, 8 октябр, дар музофоти Кундузи* Афғонистон бар асари таркиши шадид дар масҷиди шиаҳои Сайидобод беш аз 100 нафар кушта ва даҳҳо нафар маҷрӯҳ шуданд. Тавре АМИТ «Ховар» хабар медиҳад, дар ин бора хабаргузории «Al Arabia» иттилоъ дод.

Таркиш тақрибан соати 13:30 ба вақти маҳаллӣ (соати 14:00 ба вақти Душанбе) ҳангоми ҷамъ шудани издиҳоми зиёди мардум барои намози ҷумъа содир карда шуд. Бино ба маълумоти пешакӣ, таркишро маргталаб вориди масҷид шуда, анҷом додааст.

Ҳаракати «Толибон»*, ки қудратро дар Афғонистон ба даст гирифт, ҳамлаи террористиро ба дӯши ҷангиёни «Давлати исломӣ дар Хуросон», ки шохаи созмони террористии «Давлати исломӣ»* мебошад, бор кард.

Ба гуфтаи сухангӯи ҳаракати «Толибон» Забиуллоҳ Муҷоҳид, неруҳои махсус дар маҳалли таркиш қарор доранд ва ҳоло тафтиш бурда мешавад. Сухангӯи вазорати корҳои дохилии Афғонистон Саид Хостӣ ба «РИА Новости» хабари таркишро тасдиқ кард, аммо тазаккур дод, ки шумораи қурбониён маълум нест.

Қобили зикр аст, ки инфиҷор ва ҳамлаҳои террористӣ дар масоҷиди шиамазҳабиёни Афғонистон қаблан низ рух дода буданд, аммо ин аввалин таркиш аз замони ба даст овардани ҳокимият аз ҷониби Толибон* аст.

_______________________________

* Ташкилоти террористии мамнуъ дар Тоҷикистон

*Кундуз – дар қуруни вусто Куҳандиж, Кӯҳанздиз («Ман ба асли ҳар сухан рафтам беҳ аз чандин туе, Кундузеро, ки ту медонӣ, куҳандиз будааст». Лоиқ).

АКС аз манбаъҳои боз