ВГИК АВВАЛИН ФИЛИАЛИ ХУДРО ДАР ТОШКАНД КУШОД. Ректори он Владимир Малишев аз ҳунармандони маъруфи Тоҷикистон, ки солҳои гуногун ин муассисаи таълимиро хатм кардаанд, ёдовар мешавад

ДУШАНБЕ, 04.10.2021 /АМИТ «Ховар»/. Дар Тошканд Филиали Институти давлатии умумирусиягии кинематографияи ба номи С. Герасимов ( Всероссийский государственный институт кинематографии, ВГИК), ки аллакай дар соли таҳсили 2021/22 ба кор оғоз мекунад, ифтитоҳ гардид. Муаррифии филиали ВГИК 1 октябр дар доираи 13-умин Кинофестивали байналмилалии Тошканд “Дурдонаҳои роҳи абрешим” баргузор гардид. Тавре АМИТ «Ховар» хабар медиҳад, дар ин бора рӯзномаи «Фарҳанг» иттилоъ додааст.

Донишҷӯёни филиал дар чунин соҳаҳо ба мисли «драматургия» ва “продюсери филм» омӯзиш хоҳанд гирифт. Барои филиали ВГИК дар ҳудуди Агентии кинематографияи Ҷумҳурии Узбекистон бинои алоҳида ҷудо гардида, дар оянда нақша аст, ки фаъолияти филиал васеъ шавад.

«Ҳеҷ кас дар ин ҷо кинематографияи русиро омӯзонданӣ нест, бояд кинематографияи миллӣ вуҷуд дошта бошад, аммо бо мероси ғании башарии инсонӣ ва умедворам, ки мо ба ин ноил хоҳем шуд!», – иброз дошт ректори ВГИК Владимир Малишев.

Шакли таҳсил дар филиал рӯзона, ғоибона ва фосилавӣ хоҳад буд.

Омӯзиш дар асоси гранти давлатӣ ва шартномаи пулакӣ гузаронида мешавад, дар ҳоле ки кормандони давлатӣ пас аз хатми донишгоҳ бояд дар тӯли панҷ сол дар як ширкати филмсозӣ, телевизион ва радио ва як созмон дар соҳаи филм ва телевизион фаъолият намоянд.

Хатмкунандагони ВГИК дипломи шакли русиягӣ мегиранд, ки он дар Узбекистон низ эътироф мешавад.

Зимнан, чанд насли ҳунармандони боистеъдоди Тоҷикистон хатмкардагони ин муассисаи таълимӣ ҳастанд. Дар ин бора ректори ВГИК Владимир Малишев дар китоби худ «Кинематографияи Тоҷикистон ва ВГИК», ки соли 2019 нашр гардида, ба 100 -солагии ин донишгоҳ бахшида шудааст, менависад.

«Соли 2019 барои кинематографияи тоҷик низ аҳамияти калон дорад. 16 октябри соли 1929 ба вакилони Анҷумани III ғайринавбатии Иттифоқҳои Тоҷикистон, ки Эъломия дар бораи таъсиси Ҷумҳурии мустақили тоҷик дар ҳайати ИҶШС -ро қабул карданд, аввалин шумораи хроникавии киномаҷаллаи «Тоҷикистони Шӯравӣ» намоиш дода шуд.

Муаллифи китоб менависад, маҳз ҳамин сана нуқтаи оғози кинои тоҷик маҳсуб мешавад. — Дар байни аввалин донишҷӯёни ВГИК — зодагони Тоҷикистон — ду ҷавон буданд- Николай Рожков ва Владимир Хабур (ӯ дар эҷоди шумораи аввали маҷаллаи «Тоҷикистони Шӯравӣ» иштирок карда буд). Аввали солҳои 30 -юм онҳоро «Тоҷиккино» якҷоя бо Кумитаи Марказии комсомоли Тоҷикистон ба Москва барои хондан фиристод. Пас аз чанд сол, В.Хабур дар ёддоштҳояш нақл кард, ки чӣ гуна пас аз ворид шудан бо як донишҷӯи тоҷик Комил Ёрматов вохӯрд, ки ӯ низ дар Мактаби техникии давлатии кинематография — ГИК (солҳои гуногун ВГИК номида мешуд) таҳсил мекард ва бо амри тақдир яке аз офарандагони филмҳои бадеии тоҷик гардид.

Дар китоб Владимир Малишев дигар намояндагони Тоҷикистонро, ки солҳои гуногун ВГИК-ро хатм кардаанд, бо ифтихор ба ёд меорад. Дар байни онҳо Иброҳим Барамиков, Ғуломмирзо Баҳор, Кова Баҳор, Борис Кимёгаров, Елизавета Кимёгарова, Марат Орипов, Маматқул Арабов, Муқаддас Маҳмудов, Маргарита Қосимова, Сайфулло Ҷӯрабоев, Аскар Ҳаким, Мунаввар Мансурхоҷаев, Юнус Юсупов, Бахтиёр Худойназаров ва бисёри дигарон ҳастанд.

АКС: Jphollow, CC BY-SA 3.0