Имрӯз дастаҳои мунтахаби ҷавонони Тоҷикистон ва Непал бо ҳам рақобат мекунанд

ДУШАНБЕ, 28.10.2021 /АМИТ «Ховар»/. Имрӯз, соати 19:00, дар Варзишгоҳи марказии ҷумҳуриявии шаҳри Душанбе бозии даври дуюми Мусобиқаи интихобии Ҷоми Осиё-2022 оид ба футбол миёни дастаҳои  мунтахаби  ҷавонони  то 23-солаи  Тоҷикистон бо дастаи Непал баргузор мегардад, иттилоъ медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

26 октябр дар шаҳри Душанбе Мусобиқаи интихобии Ҷоми Осиё-2022 миёни футболбозони то 23-сола дар гурӯҳи «В» оғоз ёфт. Дар даври аввал дастаи мунтахаби ҷавонони  то 23-солаи  Тоҷикистон   бо роҳбарии сармураббӣ Мубин Эргашев бар дастаи мунтахаби ҷавонони  Лубнон бо ҳисоби 1:0 ғалаба кард.

Голи ягонаи рақобатро ҳимоятгари дастаи футболи   «Истиқлол»-и шаҳри Душанбе Ваҳдат Ҳаннонов дар дақиқаи 87-ум ба нишон расонид. Дар бозии дигари гурӯҳ дастаи мунтахаби ҷавонони  Эрон ба дарвозаи дастаи мунтахаби ҷавонони Непал 4 голи беҷавоб зад.

Бозиҳои оянда:

Даври 2-юм

28 октябр (панҷшанбе)

16:00. Лубнон – Эрон

19:00. Непал – ТОҶИКИСТОН

Даври 3-юм 

31 октябр (якшанбе)

16:00. Лубнон – Непал

19:00. Эрон – ТОҶИКИСТОН

                                                                  АКС аз Федератсияи футболи Тоҷикистон