Муовини Вазири молияи Тоҷикистон дар машварати минтақавии Фонди байналмилалии рушди кишоварзӣ (IFAD) дар Туркия ширкат намуд

Октябрь 21, 2021 11:25

ДУШАНБЕ, 21.10.2021 /АМИТ «Ховар»/. 11-14 октябр дар шаҳри Истанбули Ҷумҳурии Туркия семинари минтақавии Фонди байналмилалии рушди кишоварзӣ (IFAD) оид ба мониторинг ва арзёбӣ бо иштироки 50 намояндаи мақомоти давлатӣ ва кормандони лоиҳаҳои аз ҷониби Фонди мазкур маблағгузоришаванда аз 11 кишвари Аврупои Шарқӣ, Шарқи Наздиқ, Қафқоз ва Осиёи Марказӣ баргузор гардид, ки дар он муовини Вазири молияи Ҷумҳурии Тоҷикистон Юсуф Маҷидӣ чун меҳмони фахрӣ иштирок намуд.

Тавре аз Вазорати молия ба АМИТ «Ховар» хабар доданд, Юсуф Маҷидӣ дар машварат доир ба вазъи кунунии ҳамкории Тоҷикистон  бо Фонди байналмилалии рушди кишоварзӣ сухан гуфта, аз он изҳори қаноатмандӣ кард. Зикр гардид, ки шурӯъ аз соли 2008 бо ҷалби сармоягузории IFAD дар кишвар 4 лоиҳаи давлатии сармоягузорӣ ба маблағи умумии 80 млн. доллари амрикоӣ татбиқ гардида, шумораи манфиатгирандагон дар маҷмӯъ 300 ҳазор хонавода аз 17 ноҳияи ҷумҳуриро ташкил додааст.

Юсуф Маҷидӣ миннатдории худро ба роҳбарияти  Дафтари минтақавии IFAD барои Аврупои Шарқӣ ва Осиёи Марказӣ барои ташкили чунин машварати муфид ва даъвати ҳайати Ҷумҳурии Тоҷикистон, иборат аз намояндагони вазорату идораҳои дахлдор ва кормандони лоиҳаҳои Фонд дар Тоҷикистон изҳор намуд.

Дар машварат маросими супоридани сертификатҳо ба шунавандагони семинари омӯзишӣ бо иштироки муовини Вазири молияи Ҷумҳурии Тоҷикистон ва роҳбарияти Дафтари минтақавии IFAD барои Аврупои Шарқӣ ва Осиёи Марказӣ сурат гирифт.

14 октябр вохӯрии муовини Вазири молия Юсуф Маҷидӣ бо Директори Дафтари минтақавии IFAD барои Аврупои Шарқӣ ва Осиёи Марказӣ Бернард Ҳиен ва Директори кишварии IFAD барои Тоҷикистон Микаэл Каутту баргузор шуд. Дар ҷараёни мулоқот масъалаи тарҳрезӣ ва омодасозии лоиҳаи нави IFAD таҳти унвони «Дастгирии соҳаи кишоварзӣ дар заминаи ҷомеа» (CASP+) мавриди муҳокима қарор дода шуд.

Ҳадафи асосии лоиҳаи CASP+ аз баланд бардоштани сатҳи некӯаҳволии мардуми деҳот, тақвият бахшидани амнияти озуқаворӣ ва рафъи осебпазирии аҳолӣ нисбат ба тағйирёбии иқлим иборат мебошад, ки ба ҳадафу афзалиятҳои Стратегияи миллии рушди мамлакат барои давраи то соли 2030 пурра мутобиқат менамояд.

Маблағи умумии лоиҳаи мазкур ба 77,66 млн доллари амрикоӣ баробар буда, аз ин ҳисоб сармоягузории IFAD 38,5 млн доллари амрикоиро ташкил медиҳад. Ҳамчунин ҷалби ҳаммаблағгузорӣ аз ҷониби Фонди Иқлими Сабз дар ҳаҷми 39 млн доллар ва аз Созмони озуқаворӣ ва кишоварзӣ 0,16 млн доллари амрикоӣ дар назар дошта шудааст.

Дар интиҳои вохӯрӣ ҷонибҳо азми қавии худро ҷиҳати густариши минбаъдаи ҳамкории мутақобилан судманд миёни Ҷумҳурии Тоҷикистон ва Фонди байналмилалии рушди кишоварзӣ баён доштанд.

АКС: Вазорати молия

Октябрь 21, 2021 11:25

Хабарҳои дигари ин бахш

Миёни Ҳукумати Ҷумҳурии Тоҷикистон ва Корпоратсияи байналмилалии молиявӣ Созишномаи ҳамкорӣ ба имзо расид
Дар Тоҷикистон истеҳсоли картошка нисбат ба ҳамин давраи соли гузашта 144 ҳазор тонна зиёд гардидааст
МУЖДАИ ЗАФАР. Кишоварзони ноҳияи Кӯшониёни вилояти Хатлон нақшаи истеҳсоли пахтаро иҷро намуданд
Иля Федоров, директори департаменти Вазорати рушди иқтисоди ФР: Иқтидори тиҷоратии Русия ва Тоҷикистон ба тавре ки мебояд, истифода нашудааст
ИМРӮЗ — РӮЗИ БАЙНАЛМИЛАЛИИ САРФАИ ЭНЕРГИЯ. Коршиноси АМИТ «Ховар» мегӯяд, ки чаро он ба Тоҷикистон ин қадар зарур аст
Дар Душанбе Муколамаи миллии сатҳи баланд оид ба низоми озуқаворӣ дар Ҷумҳурии Тоҷикистон баргузор шуд
Вазири кишоварзии Тоҷикистон дар ноҳияи Мастчоҳ бо ҷараёни ҷамъоварии пахта ва коркарди он шинос гардид
Таҳкими ҳамкории Тоҷикистон ва Туркия дар бахши ҳифзи муҳити зист дар Глазго баррасӣ шуд
Дар Душанбе Форуми занони соҳибкор гузаронида мешавад
IFAD дар Тоҷикистон бо назардошти масъалаҳои иқлим лоиҳаи нав татбиқ менамояд
ОМОДАГӢ БА ЗИМИСТОН. Шаҳру ноҳияҳои вилояти Хатлон барои хуб гузаронидани фасли сармо дастури мушаххас гирифтанд
Ҳоким Холиқзода: Конститутсия дар Тоҷикистон заминаи татбиқи ислоҳоти куллиро фароҳам овард