Русия аз фаъолшавии ҷангҷӯёни ДИИШ* дар Афғонистон изҳори нигаронӣ кард

ДУШАНБЕ, 08.10.2021/АМИТ «Ховар»/. Намояндаи расмии Вазорати корҳои хориҷии Русия Мария Захарова (ДАР АКС) зимни як нишасти матбуотӣ дирӯз, 7 октябр, гуфт, ки Маскав аз афзоиши фаъолиятҳои ҷангҷӯёни гурӯҳи террористии «Давлати исломӣ»* дар Афғонистон нигарон аст, хабар медиҳад АМИТ «Ховар» бо истинод ба  ТАСС.

«Мо аз афзоиши фаъолияти гурӯҳи террористии ДИИШ* дар Афғонистон нигарон ҳастем», — гуфт   Захарова.

Ба гуфтаи вай, ахиран террористони ДИИШ* дар наздикии масҷид дар маркази Кобул як ҳамлаи бузурги террористӣ анҷом доданд, ки дар натиҷаи он 20 сокини маҳаллӣ кушта ва беш аз 30 нафари дигар маҷрӯҳ шуданд.

Вай зикр кард, ки «Давлати исломӣ»* амалиёти ҷангиро дар ҷануби кишвар низ афзоиш додааст.

Мария Захарова инчунин нигаронии Русияро аз афзоиши амалиётҳои ҷангҷии ДИИШ* дар наздикии сафорати Русия дар Кобул баён кард.

«Мо аз мақомоти Афғонистон даъват мекунем, ки барои таъмини амнияти намояндагии дипломатии Русия ва ҳамчунин шаҳрвандони Русия дар Афғонистон чораҳои иловагӣ андешанд», — гуфт намояндаи расмии Вазорати хориҷаи Русия.

Вазъият дар Афғонистон моҳи июн бо хуруҷи нерӯҳои амрикоӣ шиддат гирифт. Дар миёнаҳои моҳи август гурӯҳи «Толибон»* тақрибан ҳамаи шаҳрҳои бузург ва гузаргоҳҳои марзиро ишғол карданд.

Он замон ҷангҷӯён кафолат доданд, ки ба давлатҳои ҳамсоя, бахусус ҷумҳуриҳои пасошӯравии Осиёи Марказӣ ҳуҷум  нахоҳанд кард.

Ашраф Ғанӣ, президенти собиқи Афғонистон бо воридшавии ҷангҷӯёни «Толибон»* ба шаҳри Кобул аз мақомаш истеъфо дод ва ҷумҳуриро тарк кард.

_________________________

* Гурӯҳи террористии мамнӯъ дар Тоҷикистон ва Русия

                                                                          АКС аз манбаҳои боз