СӮХТОР ДАР МАРКАЗИ САВДОИ «БАРАКАТ». Таҳқиқи ҳодиса идома дошта, сабабу зиёни он муайян карда мешаванд

ДУШАНБЕ, 22.10.2021 /АМИТ «Ховар»/. Дирӯз, 21 октябр дар нуқтаи фурӯши чӯбу тахтаи маркази савдои «Баракат»-и ҶДММ «Агрофут», воқеъ дар ноҳияи Бобоҷон Ғафурови  вилояти Суғд сӯхтор ба амал омад. Аз тарафи мутахассисони Хадамоти давлатии оташнишонии Вазорати корҳои дохилии ҷумҳурӣ ва дигар сохторҳои дахлдор таҳқиқи ҳодисаи мазкур  давом дошта,   сабаб ва зиёни сӯхтор муайян карда мешаванд, хабар медиҳад АМИТ «Ховар» бо истинод ба ВКД ҶТ.   

Тавре дар вазорат шарҳ доданд, ҳангоми ба маҳали ҳодиса расидани оташнишонон сӯхтор дар масоҳати 400 метри мураббаъ паҳн гардида, чӯбу тахтаҳои зери зери тентҳо (чатрҳо)-ро  оташ фаро гирифта буд. Сӯхтори мазкур бо қувваю воситаҳои ҷузъу томҳои Раёсати хадамоти давлатии оташнишонии вилояти Суғд дар масоҳати аввалааш  пурра хомӯш карда, дигар нуқтаҳо ва биноҳои ёрирасон аз сӯхтор эмин нигоҳ дошта шуданд.

Дар баробари амалиёти сӯхторхомӯшкунӣ аз ҷойи ҳодиса молу маҳсулоти соҳибкоронро ба ҷойҳои безазар кӯчониданд.

Бино ба маълумоти ВКД, маблағи аз ҳодисаи сӯхтор эмин нигоҳдошташуда 100 миллион сомониро ташкил медиҳад.

                                                               Акс: ВКД ҶТ