ДУШАНБЕ, 29.10.2021 /АМИТ «Ховар»/. «Таъсири ҷаҳонишавӣ ба равандҳои сиёсии Тоҷикистон»-таҳти чунин унвон имрӯз Пажӯҳишгоҳи равандҳои сиёсӣ, дипломатӣ ва масоили ҷаҳонишавии Академияи идоракунии давлатии назди Президенти Ҷумҳурии Тоҷикистон баҳри таҳлил намудани пайомадҳои манфӣ ва мусбати равандҳои ҷаҳонишавӣ, инчунин дарёфти роҳҳои пешгирӣ аз татбиқи унсурҳои зараровари равандҳои ҷаҳонишавӣ конференсияи соҳавии ҷумҳуриявӣ баргузор намуд, хабар доданд ба АМИТ «Ховар» аз Академияи идоракунии давлатӣ.

Дар конференсия олимон, муҳаққиқони пажуҳишгоҳҳои илмӣ-таҳқиқотӣ, муассисаҳои таҳсилоти олии касбии дохили мамлакат ва намояндаҳои идораҳои давлатӣ иштирок намуданд.

Ноиби ректор оид ба илм ва инноватсияи Академия идоракунии давлатӣ Амид Комилбек иброз дошт, ки раванди ҷаҳонишавӣ унсури ҷудонопазири ҷомеаи ҷаҳонӣ ба ҳисоб рафта, вобаста ба хусусиятҳои дар худ инъикосёфта ба шароити иқтисодӣ-иҷтимоӣ ва соҳаҳои мухлатифи ҳаёти ҷамъиятии давлатҳои соҳибихтиёру мустақил ҳам таъсири мусбат ва ҳам манфӣ мерасонад. Тоҷикистон ва халқи тоҷик дар гирдоби равандҳои ҷаҳонишавӣ тавассути кӯшишҳои хирадмандонаю пайгиронаи Асосгузори сулҳу ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон тавонист унсурҳои муҳими давлатии худ, ба монанди забони давлатӣ, фарҳанги миллӣ ва ёдгориҳои таърихиро на танҳо ҳифз, балки ба  ҷаҳониён муаррифӣ намояд.

Дар ҳамоиш иштирокчиён дар  мавзӯъҳои «Паёмҳои Президенти Ҷумҳурии Тоҷикистон ҳамчун сарчашмаи қабули санадҳои меъёрии ҳуқуқӣ дар раванди ҷаҳонишавӣ», «Ҳифзи мероси таърихию фарҳангӣ дар солҳои истиқлолияти давлатӣ», «Дискурси дипломатӣ дар раванди ҷаҳонишавӣ», «Таъсири ҷахонишавӣ ва ҳуқуқи инсон» сухан гуфтанд.

АКС: Академияи идоракунии давлатии назди Президенти ҶТ