АМНИЯТ ВА РУШДИ ОСИЁИ МАРКАЗӢ ДАР ШАРОИТИ НАВИ ВАЗЪИЯТ ДАР АФҒОНИСТОН. Ин масъала зимни ҳамоиши байналмилалӣ дар Душанбе мавриди баррасии таҳлилгарон қарор гирифт

Ноябрь 19, 2021 18:22

ДУШАНБЕ, 19.11.2021. /АМИТ «Ховар»/. Имрӯз дар шаҳри Душанбе бо ташаббуси  Институти Русия, Аврупои Шарқӣ ва Осиёи Марказии Академияи илмҳои ҷамъиятии Ҷумҳурии Мардумии Чин ва дастгирии Институти таҳқиқоти стратегии назди Президенти Ҷумҳурии Қазоқистон, Иститути миллии таҳқиқоти стратегии Ҷумҳурии Қирғизистон, Маркази тадқиқоти стратегии назди Президенти Ҷумҳурии Тоҷикистон, Институти муносибатҳои байналмилалии Вазорати корҳои хориҷии Туркманистон, Институти таҳқиқоти стратегӣ ва байниминтақавии  назди Президенти Ҷумҳурии Узбекистон Форуми байналмилалии марказҳои таҳлилии Ҷумҳурии Мардумии Чин ва кишварҳои «панҷгона»-и Осиёи Марказӣ дар мавзӯи «Амният ва рушди Осиёи Марказӣ дар шароити нави вазъият дар Афғонистон» дар шакли ҳузурӣ ва маҷозӣ баргузор гардид. Дар ин бора АМИТ «Ховар» бо истинод ба хадамоти  матбуоти Маркази тадқиқоти стратегии назди Президенти ҶТ хабар медиҳад.

Мавриди зикр аст, ки имрӯз масъалаи вазъи сиёсии Афғонистон  аз масъалаҳои муҳим буда, дар сархати хабару гузоришҳои расонаҳои ҷаҳон ва ҳамоишҳои байналмилалӣ қарор дорад. Дар ҳамоиши имрӯзаи Чин ва кишварҳои «панҷгона»-и Осиёи Марказӣ низ ин мавзӯъ аз ҷониби коршиносону таҳлилгарон мавриди муҳокима ва баррасӣ қарор гирифт.

Дар  бахши дуюми Форум директори Маркази тадқиқоти стратегии назди Президенти Ҷумҳурии Тоҷикистон, доктори илмҳои фалсафа, профессор Хуршед Зиёӣ дар мавзӯи «Таъсири вазъияти нав дар Афғонистон дар конфигуратсияи амният дар минтақаи Осиёи Марказӣ» маърӯзаи илмӣ  намуда, зикр кард, ки Тоҷикистон кӯшишҳои ҷомеаи ҷаҳониро дар ҳалли ҳамаҷонибаи қазияи Афғонистон пуштибонӣ мекунад ва чунин мешуморад, ки ҳаққи муайян кардани ояндаи Афғонистон комилан ба худи мардуми ин кишвар тааллуқ дорад.

«Мо ҷонибдори Ҳукумати фарогир ва ҳамашумул дар Афғонистон мебошем ва ин мавқеъгириро Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳамоишҳои сатҳи баланди байналмилалӣ иброз доштаанд. Гузашти вақт нишон  медиҳад, ки мавқеъгирии давлати Тоҷикистон дар қазияи Афғонистон дурусту саҳеҳ мебошад, ки кишварҳои дигар онро пуштибонӣ намуда, пайравӣ карда истодаанд», — афзуд. Х. Зиёӣ.

Мавсуф  иброз дошт, ки Ҷумҳурии Тоҷикистон ба ҳифзи тамомияти арзии ин давлати дӯсту ҳамсоя ва таъмини ваҳдати ҳамаи неруҳои сиёсии он манфиатдор буду ҳаст. «Кишвари мо, — гуфт Хуршед Зиёӣ, — дар фаъолияти муштараки ҷомеаи ҷаҳонӣ дар кушодани кӯргиреҳи қазияи Афғонистон саҳм хоҳад гирифт. Президенти Ҷумҳурии Тоҷикистон муҳтарам Эмомалӣ Раҳмон дар ин маврид барҳақ фармудаанд, ки «Афғонистони бародар ва ҳамкешу ҳамзабон дар байни кишварҳои минтақа дар самти вусъат додани ҳамкории гуногунсоҳаи мутақобилан судманд барои мо ҳамеша ҳаққи афзалият хоҳад дошт».

Бино ба зикри Х. Зиёӣ, аҳаммияти самти минтақавии сиёсати хориҷии Тоҷикистон, пеш аз ҳама, дар он ифода мешавад, ки имрӯз манфиатҳои миллӣ, амнияти миллӣ ва рушди иқтисодии кишварҳои минтақаи Осиёи Марказӣ ва Афғонистон ба ҳам вобастагии зич дошта, таъмини комили рушду субот ва амнияти ҳар кишвар танҳо дар заминаи таъмини рушду амнияти минтақавӣ имконпазир мебошад.

Иштирокчиёни ҳамоиши байналмилалӣ ҳамоҳангсозии амалу фаъолият, табодули иттилоот ва расонидани кумакҳои ҳамдигарӣ, мустаҳкам намудани ҳамкориҳо дар соҳаҳои сиёсию амниятӣ, иқтисодиёту тиҷорат ва дигар соҳаҳои муҳимми хоҷагии халқи ин давлатҳоро  таъкид ва таъйид намуданд.

Ёдовар мешавем, ки ҳамоиши мазкур ба 30-солагии истиқлоли давлатҳои Осиёи Марказӣ ва 30-солагии барқарор гардидани муносибатҳои дипломатӣ байни Чин ва панҷ кишвари Осиёи Марказӣ  бахшида шуд.

АКС: Маркази тадқиқоти стратегии назди Президенти ҶТ

Ноябрь 19, 2021 18:22

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»