Дар Тоҷикистон Фестивали филмҳои беовоз доир мегардад

Ноябрь 17, 2021 15:02

ДУШАНБЕ, 17.11.2021 /АМИТ «Ховар»/. Аз 24 то 26 ноябр дар шаҳри Душанбе бо дастгирии Донишкадаи Гётеи Узбекистон дар ҳамкорӣ бо Муассисаи давлатии «Тоҷикфилм» дар робита ба пойтахти фарҳангии кишварҳои Иттиҳоди Давлатҳои Мустақил эълон гардидани шаҳри Душанбе дар соли 2021 Фестивали филмҳои беовоз баргузор мегардад, иттилоъ доданд аз Муассисаи давлатии «Тоҷикфилм» ба АМИТ «Ховар».

Дар фестивали мазкур дар кинотеатри ба номи Тоҳир Собиров ва кинотеатри «Ватан» барои доираи васеи алоқамандони кино 10 филми беовоз ба намоиш гузошта мешаванд.

Аз миёни ин филмҳо 3 филми ҳунарӣ- «Талош» (муаллиф ва коргардон Соҳибёр Толиб), «Муҳоҷир» (коргардон К.Ёрматов), «Вақте ки амирон мемиранд» (коргардон Л.Печорина), 3 филми мустанади «Омадани аввалин қатора ба Душанбе» (наворбардорон В. Кузин, А. Шевич, Н. Гезулин), «Зилзила дар Янгибозор» (коргардон Л.Райгородский), «Адрасмон XIV»-и коргардон Бақо Содиқов аз  Муассисаи давлатии «Тоҷикфилм», 2 филми ҳунарии истеҳсоли «Узбекфилм»- «Манораи марг»-и коргардон Вячеслав Висковский ва «Махав»-и коргардон Олег Фрелих, 1 филми тасвирии олмонӣ «Саргузашти шоҳзода Аҳмад»-и коргардонҳо Лотти Рейнигер ва Карл Кох ва 1 филми тасвирии «Ҳувайдо»-и коргардон Лолисанам Улуғова мебошанд.

Ёдовар мешвем, ки аввалин киносозон бародарони франсуз Люмерҳо Луи ва Огюст мебошанд. Дастгоҳи наворбардории онҳо Люмер ном дошт, ки бо кумаки ин дастгоҳ ба осонӣ ба навор гирифтани филми беовоз мумкин буд. Аввалин маротиба филми офаридаи онҳо моҳи марти соли 1895 дар Париж ба намоиш гузошта шуд. То соли 1927 қариб тамоми киноҳо беовоз буданд. Соли 1920 аввалин системаи сабти овоз ихтироъ гардид. Ин боис гардид, ки соли 1927 аввалин кинои овоздор аз ҷониби ширкати амрикоии «Уорнер Брозерс» рӯйи экран барояд.

Дар Тоҷикистон филми «Ҳуқуқи бошараф» соли 1932 аввалин филми таҳиякардаи Ёрматов дар «Тоҷиккино» мебошад. Филми «Муҳоҷир», ки соли 1934 аз ҷониби коргардон  Комил Ёрматов ба навор гирифта шуда буд, барҷастатарин филми бадеии беовози тоҷик маҳсуб мешавад. Дар филми «Муҳоҷир» нақши асосиро, ки Комил ном дорад, худи Комил Ёрматов ва завҷаи қаҳрамон — нақши асосии занонаро аввалин ҳунарпешаи кинои тоҷик София Тӯйбоева бозӣ кардаанд.

 АКС: Муассисаи давлатии «Тоҷикфилм»

Ноябрь 17, 2021 15:02

Хабарҳои дигари ин бахш

Зеҳни сунъӣ дар соҳаҳои санъати тасвирӣ ва дизайн тағйироти амиқ ба вуҷуд овардааст
Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд
«АНДАЛЕБ-2025». Дар Панҷакент даври шаҳрии фестивал- озмуни ҷумҳуриявии телевизионӣ доир шуд