Паҳлавонони тоҷик дар Чемпионати ҷаҳон оид ба гӯштини камарбандӣ соҳиби се медали биринҷӣ гардиданд

ДУШАНБЕ, 01.11.2021 /АМИТ «Ховар»/. Дар шаҳри Қазони Ҷумҳурии Тотористони Федератсияи Русия Чемпионати ҷаҳон оид ба намуди гӯштини  камарбандӣ бо иштироки беш аз 350 нафар варзишгарон аз 21 давлати дунё доир гардид, ки намояндагони Тоҷикистон низ дар он ширкат варзиданд, хабар дод корманди Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ҳалимҷон Набизода  ба шореҳи варзиши  АМИТ «Ховар». 

Дар Чемпионати ҷаҳон оид ба намуди гӯштини  камарбандӣ аз Ҷумҳурии Тоҷикистон 18 нафар варзишгарон иштирок намуданд.

Аз миёни онҳо дар вазни 57 кг Меҳроҷ Рабиев, дар вазни 62 кг  Кароматулло Қурбонов ва дар вазни  90 кг  Беҳрӯз Гулмаҳмадзода дар маҷмӯъ 3 медали биринҷӣ ба даст оварда, парчами давлатии Ҷумҳурии Тоҷикистонро дар Чемпионати ҷаҳон оид ба гӯштини камарбандӣ парафшон намуданд.

                                                                                                            АКС аз КМО Тоҷикистон