«САФОИ ДОНИШҶӮ». Дар Донишгоҳи миллии Тоҷикистон Маҷмааи маишӣ-хизматрасонӣ ифтитоҳ ёфт

ДУШАНБЕ, 3.11.2021. /АМИТ «Ховар»/. Бахшида ба таҷлили 30-солагии Истиқлолияти давлатии Ҷумҳурии Тоҷикистон дар назди хобгоҳи №6-и Донишгоҳи миллии Тоҷикистон, воқеъ дар маҳаллаи Буни Ҳисорак бинои дуошёнаи Маҷмааи маишӣ-хизматрасонии «Сафои донишҷӯ» ба фаъолият оғоз намуд, иттилоъ доданд аз Донишгоҳи миллии Тоҷикистон ба АМИТ «Ховар».

Маҷмааи маишӣ-хизматрасонии «Сафои донишҷӯ» бо иштироки Вазири маориф ва илми Ҷумҳурии Тоҷикистон Муҳаммадюсуф Имомзода, муовини Раиси шаҳри Душанбе Мавсума Муинӣ, ректори донишгоҳ Қобилҷон Хушвахтзода, намояндаи Мақомоти иҷроияи ҳокимияти давлатии ноҳияи Сино ва устодону донишҷӯёни донишгоҳ мавриди истифода қарор дода шуд.

Зикр шуд, ки Маҷмааи маишии мазкур аз кошонаи ҳусн, сартарошхона, ошхона ва ҳаммом бо буғхона иборат буда, барои донишҷӯёне, ки дар хобгоҳ истиқомат мекунанд, туҳфаи арзанда аст. Нуқтаҳои кошонаи ҳусн, сартарошхона, ошхона, ҳаммом бо буғхона ва гӯшаи гиёҳҳои шифобахш, ки маҳсули Парки технологии донишгоҳ аст, дар шароити замонавӣ ба истифода дода шудаанд.

Зимни ифтитоҳи маҷмаа зикр шуд, ки дар партави иқдомҳои неки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба ятимону бепарасторон дар донишгоҳ бо мақсади таъмини шароити зиндагии арзанда, рушди баркамол ва соҳибилму соҳибмаърифат гардидани онҳо тамоми шароити муосир фароҳам оварда шудааст.

Ҳамин тавр, дар робита ба ҷашни бузурги миллӣ- 30-юмин солгарди Истиқлолияти давлатӣ ва ифтитоҳи маҷмааи мазкур дар ошхонаи маҷмаа барои донишҷӯёни ятиму маъюб хони идона ороста шуда, ба онҳо туҳфаҳои хотиравии Президенти Ҷумҳурии Тоҷикистон муҳтарам Эмомалӣ Раҳмон супорида шуданд.

АКСҲО: ДМТ