Сарвазири Тоҷикистон Қоҳир Расулзода бо муовини Дабири кулли СММ Ғода Фатҳӣ Волӣ мулоқот намуд

Ноябрь 29, 2021 14:47

ДУШАНБЕ, 29.11.2021. /АМИТ «Ховар»/. Имрӯз Сарвазири Ҷумҳурии Тоҷикистон Қоҳир Расулзода бо муовини Дабири кулли Созмони Милали Муттаҳид-мудири иҷроияи Дафтари Созмони Милали Муттаҳид оид ба маводи нашъаовар ва ҷинояткорӣ Ғода Фатҳӣ Волӣ мулоқот намуд, хабар медиҳад АМИТ «Ховар».

Дар мулоқот муҳимтарин масъалаҳои дуҷонибаву бисёрҷониба дар доираи Созмони Милали Муттаҳид  ва ниҳодҳои зертобеи он мавриди таҳлилу баррасӣ қарор гирифта, барои боз ҳам тавсеа бахшидани ҳамкории дуҷониба ҳавасмандӣ зоҳир карда шуд.

Таъкид шуд, ки Ҳукумати Ҷумҳурии Тоҷикистон бо Дафтари Созмони Милали Муттаҳид оид ба маводи нашъаовар ва ҷинояткорӣ дар ҳалли масъалаҳои марбут ба пешгирӣ ва мубориза бар зидди гардиши ғайриқонунии маводи нашъаовар, ҷиноятҳои муташаккили фаромилӣ, терроризму ифротгароӣ, қочоқи инсон, ҳифзи сарҳадот ва таҳкими зарфияти кормандони сохторҳои зиддимухадиротӣ ҳамкорӣ ба роҳ мондааст.

Мавриди зикр аст, ки дар 30 соли соҳибистиқлолӣ Тоҷикистон ҳамчун кишвари ҷонибдори сулҳ ва амнияти байналмилалӣ шуҳрати ҷаҳонӣ касб намуда, баҳри сулҳофаринӣ бо ҷомеаи байналмилалӣ дар мубориза бо таҳдидҳо ба амният ва субот, аз ҷумла терроризму ифротгароӣ, гардиши ғайриқонунии маводи нашъаовар, қочоқи инсон ва дигар амалҳои номатлуб пайваста тадбир меандешад.

Дар идомаи ташаббус ва иқдомот солҳои охир Ҳукумати Ҷумҳурии Тоҷикистон бо шарикони рушд, аз ҷумла Созмони Милали Муттаҳид, Иттиҳоди Аврупо ва Созмони амният ва ҳамкорӣ дар Аврупо дар самти мубориза бо терроризм ва экстремизм ва пешгирии омилҳои он, сарчашмаҳои маблағгузории он соли 2018 дар шаҳри Душанбе Конфронси байналмилалии сатҳи баланд дар мавзӯи “Мубориза бо терроризм ва пешгирии экстремизми хушунатомез” ва соли 2019 Конфронси байналмилалӣ таҳти унвони “Ҳамкории байналмилалӣ ва минтақавӣ дар сатҳи мубориза бо маблағгузории терроризм тавассути қочоқи маводи нашъаовар ва ҷиноятҳои муташаккил” баргузор намуда,  дар ин самт оянда низ бо иқдому талошҳои муваффақона чораҳҳои мушаххасро амалӣ месозад.

Ноябрь 29, 2021 14:47

Хабарҳои дигари ин бахш

Дар Душанбе дурнамои ҳамкории Тоҷикистон ва Қазоқистон баррасӣ карда шуд
Санадҳои ниҳоии Конфронси байналмилалии сатҳи баланд оид ба ҳифзи пиряхҳо интишор гардиданд
Дар Москва Парчами давлатии Тоҷикистон ба ифтихори 34-солагии Истиқлолият намоиш дода мешавад
Бо ташаббуси Тоҷикистон Қатъномаи нави СММ оид ба ҳамкорӣ бо ИДМ қабул гардид
Тоҷикистон ва Эрон ҳамкориро дар соҳаи китобдорӣ ва фарҳанг густариш медиҳанд
Тоҷикистон ва Ҷопон масъалаҳои муҳими ҳамкориро баррасӣ намуданд
Дар Душанбе дурнамои равобити Тоҷикистон ва Иттиҳоди Аврупо баррасӣ гардид
9 сентябр шаршараи Ниагара бо рангҳои Парчами давлатии Ҷумҳурии Тоҷикистон фурӯзон хоҳад шуд
Ҳамкории судманди Тоҷикистон ва сохторҳои Созмони Милали Муттаҳид баррасӣ карда шуд
Дар Женева самтҳои муҳими ҳамкории Тоҷикистон бо UNHCR баррасӣ карда шуданд
Байни ҳукуматҳои Тоҷикистон ва Ҷопон доир ба лоиҳаи «JDS» Ёддоштҳои табодулӣ ба имзо расиданд
Дурнамои рушди муносибатҳои минтақаҳои Тоҷикистон ва минтақаи Приморски Русия дар бахшҳои гуногун баррасӣ шуд