Толибон дар Афғонистон риштарошӣ ва ба сартарошхонаҳо рафтани мардонро манъ карданд

Ноябрь 3, 2021 12:56

ДУШАНБЕ, 03.11.2021 /АМИТ «Ховар»/. Ҳаракати  радикалии «Толибон»*, ки қудратро дар Афғонистон ба даст овардааст, барои мардони афғон тарошидани риш ва рафтан ба сартарошхонаҳоро манъ карда, ин тасмимро ба талаботи меъёрҳои исломӣ рабт дод. Тавре АМИТ «Ховар» навиштааст, дар ин бора рӯзномаи маҳаллии Ettelaat бо такя ба суханони раиси идораи иттилоот ва фарҳанги музофоти  ҷанубии Ҳилманд Ҳофиз Рашид Ҳилмандӣ хабар додааст. — «Ришатонро натарошед!»

 Ба гуфтаи ӯ, маҳдудияте, ки охири ҳафта дар минтақаи зикршуда ба иҷро даромад, ба тамоми Афғонистон дахл дорад. Дар худи Ҳилманд,  мисли пештара дар вилояти ҷанубу шарқи Қандаҳор  иҷрои мусиқӣ низ манъ карда шуд.

Тавре намояндаи мақомоти маҳаллӣ тавзеҳ дод, қарорҳои дахлдор дар ҷаласаи махсуси вазорати даъвати исломӣ, равия, амри маъруф ва наҳйи мункар, ки қаблан солҳои 1996-2001 мавҷуд буд ва ба наздикӣ ба ҷои Вазорати кор бо занон аз нав ташкил гардид, қабул шуданд.

Қаблан расонаҳои маҳаллӣ аз баста шудани шумораи зиёди толорҳои зебоӣ барои мардон ва сартарошхонаҳо дар саросари кишвар ба далели монеъ шудани ҷангҷӯёни толибон ба фаъолияти онҳо хабар дода буданд*.

Ёдовар мешавем, ки солҳои 1996-2001 (дар нахустин зуҳури худ) аз рӯзҳои аввали ҳукмронӣ радикалҳо дар тарзи зиндагӣ ва хонаводагии афғонҳо танзими қатъӣ ҷорӣ намуда, телевизионро барҳам дода, мусиқии муосир, санъати тасвирӣ, аксу видеоро мамнӯъ эълон карданд. Илова бар ин, онҳо аз сокинони Афғонистон тақозо карданд, ки танҳо либоси миллӣ (занҳо — сиёҳ, мардон — сафед) пӯшанд ва ҳамчунин эълом доштанд, ки гузоштани риш барои ҳар мард фарзи исломӣ аст.

Ҳаракати “Толибон”, ки 13 ноябри соли 2001 аз Кобул аз ҷониби неруҳои Эътилофи шимолӣ бо дастгирии иттиҳоди байналмиллалӣ таҳти сарварии Иёлоти Муттаҳида бароварда шуда буд, баъди тақрибан 20 сол, пас аз он ки Вашингтон баҳори имсол эълон намуд, ки амалиёти ҷангии худро дар Афғонистон ба анҷом мерасонад,  аз нав назорати Афғонистонро оғоз кард. 15 август президенти Афғонистон Ашраф Ғанӣ истеъфо дода, кишварро тарк кард ва толибон бидуни ҷанг вориди пойтахт шуданд. Радикалҳо 6 сентябр аз таъсиси назорат бар тамоми қаламрави Афғонистон хабар дода, 7 сентябр ҳайати ҳукумати муваққатиро эълон карданд.

___________________

*«Толибон» — ҳаракати радикалии террористии мамнӯъ дар Тоҷикистон

ДАР АКС: тиҷорати сартарошӣ дар Афғонистон баъд аз сарнагун шудани толибон ривоҷ ёфт, вале акнун ин амал ба қафо баргашт. Акс: Getty Images

Ноябрь 3, 2021 12:56

Хабарҳои дигари ин бахш

МО ҶАВОНЕМ, МО ҶАВОНЕМ, МО ҶАВОН! Дар Тоҷикистон зиёда аз 2 миллион нафарро ҷавонон ташкил медиҳанд
РИСОЛАТИ ТАЪРИХИИ ҲИЗБИ ХАЛҚИИ ДЕМОКРАТИИ ТОҶИКИСТОН ДАР ТАҲКИМИ ПОЯҲОИ ИСТИҚЛОЛИ ДАВЛАТӢ. Андешаҳо ба ифтихори 30-солагии таъсиси ҳизб
СОЛИ МАЪРИФАТИ ҲУҚУҚӢ. Расонидани ёрии ҳуқуқии ройгон ифодагари ғамхории Пешвои миллат нисбат ба мардуми Тоҷикистон аст
«СИФАТИ ХИЗМАТРАСОНИИ ТИББӢ». Доир ба беҳтар намудани кумаки статсионарӣ ба модарон, навзодон ва кӯдакон машғулият доир гардид
Давоми шабонарӯзи охир бар асари бориши шадид дар минтақаҳои гуногуни Тоҷикистон сел ба амал омад
Бахшида ба Рӯзи ҷавонони Тоҷикистон Вазири корҳои дохилӣ бо ҷавонони фаъол вохӯрӣ намуд
Директори Хазинаи байналмилалии асъор бо занони пешсафи тоҷик мулоқот намуд
МОҲВОРАИ ҶАВОНОН. Дар шаҳри Бохтар Фестивали бозиҳои миллӣ баргузор гардид
«МАКТАБИ СИЁСИИ ПЕШВОИ МИЛЛАТ». Таҳти чунин унвон конференсияи 4-уми байналмилалии илмӣ-амалӣ доир шуд
БАХШИДА БА РӮЗИ ҶАВОНОНИ ТОҶИКИСТОН. Дар ноҳияи Панҷ бо афсарону сарбозони қисмҳои ҳарбӣ вохӯрӣ доир гардид
Дар Душанбе масъалаи фарогирии умумӣ ба хизматрасонии тандурустӣ баррасӣ гардид
Дар Душанбе бо намояндагони созмонҳои байналмилалӣ оид ба коҳиши хатари офатҳои табиӣ мулоқот доир гардид