Барномаи таҳлилии «Бозтоб»-и Радиои Ховар ба Рӯзи энергетикҳо бахшида мешавад

ДУШАНБЕ, 22.12.2021 /АМИТ «Ховар»/. Ҳамасола дар Ҷумҳурии Тоҷикистон 22 декабр Рӯзи энергетикҳо таҷлил мегардад. Ин сана шурӯъ аз соли 1936 то инҷониб ҷашн гирифта мешавад. Сол то сол дар мамлакат  бо зиёд гардидани шумораи аҳолӣ, бунёди садҳо биноҳои кориву истиқоматӣ  талабот ба неруи барқ зиёд мешавад.  Бинобар ин 13 ҳазор нафар кормандони соҳаи энергетика шабу рӯз, дар гармиву сардӣ машғули меҳнатанд, тамоми  неругоҳҳои хурду бузурги барқи обӣ беист барқ истеҳсол менамоянд, то хонаву кошонаи мо гарму равшан бошад. Аммо аз чӣ сабаб бошад, ки аксар вақт мо, сокинон заҳматҳои онҳоро нодида мегирем. Боре тасаввур кардаем, ки ин неруи бесадову бебӯю беранг ва ба ҳама дастрас бо чӣ душвориҳо тавлид меёбаду то хонаву корхонаи мо интиқол ёфтанаш кадом масофа ва чӣ монеаҳоро пушти сар менамояд?

Дар ин замина Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми хеш ба Маҷлиси Олии мамлакат 21 декабри соли равон иттилоъ доданд, ки бо мақсади расидан ба истиқлолияти энергетикӣ ва истифодаи самарабахши неруи барқ дар даврони соҳибистиқлолӣ 287 неругоҳи барқи обии хурду бузург, 1,5 ҳазор километр хатҳои интиқоли барқи баландшиддат, 50 зеристгоҳи баландшиддати барқӣ бунёду таҷдид ва дар маҷмӯъ, 75 фоизи инфрасохтори энергетикии кишвар навсозӣ гардид.

Баррасии ҳама паҳлӯҳои мавзӯи мазкур дар барномаи навбатии таҳлилии «Бозтоб» 22 декабр, соати 09:30 ва (такроран) 17:30, 21:30 аз «Радиои Ховар». 

Муҳаррир ва ровии барнома Моҳинави Наврӯз.