Дар арафаи Наврӯз бинои маъмурии Ҷамоати деҳоти «Гули сурх»-и Истаравшан ба истифода дода мешавад

ДУШАНБЕ, 14.12.2021 /АМИТ «Ховар»/. Бахшида ба 30-солагии Истиқлолияти давлатии Тоҷикистон дар шаҳри Истаравшан сохтмони бинои маъмурии Ҷамоати деҳоти «Гули сурх» ҷараён дорад, ки он дар арафаи таҷлили Наврӯзи Аҷам мавриди истифода қарор дода мешавад, иттилоъ доданд аз маркази матбуоти раиси шаҳри Истаравшан ба АМИТ «Ховар».

Бинои муосири маъмурӣ аз таҳхона ва ду ошёнаи барҳаво, толори маҷлис ва инфрасохторҳои дигари асосию ёридиҳанда иборат буда, бо ҳамкории шарикон- сокинони 17 деҳаи ҷамоат қомат афрохта истодааст.

Дар корҳои сохтмонӣ дар бинои маъмурии Ҷамоати деҳоти «Гули сурх» 26 нафар мутахассисони соҳаи сохтмон ва устоҳои хушсалиқа ба кори муваққатӣ фаро гирифта шуда, сохтмончиён саъю кӯшиш доранд, ки бинои маъмуриро мутобиқи талаботи меъёрҳои муосири шаҳрсозӣ ба истифода диҳанд.

Раиси шаҳри Истаравшан Адҳам Маъмурзода ва намояндаи Ҳукумати Ҷумҳурии Тоҷикистон, раиси Суди конститутсионии Ҷумҳурии Тоҷикистон  Абдулҳафиз Ашурзода аз ҷараёни корҳои сохтмонӣ дидан намуда, ба бинокорон ҷиҳати бо сифати баланд ва дар муҳлати муқарраргардида ба итмом расонидани корҳои сохтмонӣ дастуру супоришҳои мушаххас доданд.

АКС: маркази матбуоти раиси шаҳри Истаравшан