Дар шаҳри Бӯстон навраси 16-сола ҳангоми ба фурӯш баровардани 24 000 адад маводи тарфгарӣ боздошт шуд

ДУШАНБЕ, 13.12.2021 /АМИТ «Ховар»/. Дар даҳаи аввали моҳи декабр кормандони мақомоти корҳои дохилии вилояти Суғд 6 ҳолати муомилоти ғайриқонунӣ бо маводи тарфгариро ба қайд гирифта, маҷмуан 54 ҳазору 741 адад маводи тарфгарии садодиҳандаро, ки маъмулан «хлопушка» мегӯянд, мусодира намуданд. Аз ҷумла, дар ҳудуди шаҳри Бӯстон 4 декабр навраси 16-сола, хонандаи мактаб ҳангоми ба фурӯш баровардани 24 000 адад маводи тарфгарӣ бо номи «Трения» боздошт гардид, хабар медиҳад АМИТ «Ховар» бо истинод ба Вазорати корҳои дохилии Ҷумҳурии Тоҷикистон.

Дар Тоҷикистон муомилоти маводи тарфгарӣ бо назардошти хавфнокӣ ва оқибатҳои нохуш доштани он, чун оташангезӣ ва ҷароҳати ҷисмонӣ бардоштан манъ карда шудааст. Ҳама гуна кирдори алоқаманд ба он амали ғайриқонунӣ ҳисоб шуда, ҷавобгарии маъмурӣ ва ҳам ҷиноятӣ дар пай дорад. Аммо ҳамасола дар арафаи иди Соли нав чунин кирдорҳои зиддиҳуқуқӣ бо баҳонаи дилхушӣ авҷ гирифта, асосан ҷавонону наврасон ба ҷавобгарӣ кашида мешаванд,

7 декабр кормандони милитсия дар ҳудуди Ҷамоати деҳоти Унҷии ноҳияи Б.Ғафуров шаҳрванд Мулобоев Дилшод Муҳаммадҷонович, соли таваллудаш 2001 барои ғайриқонунӣ нигоҳдории маҳсулоти пиротехникӣ боздошт намуда, аз ӯ 24 000 дона «хлапушка» мусодира намуданд.
Аз рӯи далелҳои ошкоргардида дар асоси талаботи моддаи 199¹ Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шудааст.

Ҳамчунин дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони шуъбаи кофтукови ҷиноятии РВКД дар вилояти Хатлон, дар ҳудуди шаҳри Бохтар ҳангоми азназаргузаронии манзили истиқоматии марди 30-солаи сокини шаҳри мазкур маводи тарфгарӣ (пиротехникӣ), аз қабили «Трения» ва «Соловей разбойник» ба миқдори 12 ҳазору 709 адад дарёфт ва гирифта шуда, аз рӯи ин ҳодиса тафтиш идома дорад.

Дар шаҳри Душанбе низ дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони милитсия ҷавони 26-солаи сокини пойтахт бо гумони муомилоти ғайриқонунии маводи тарфгарӣ дастгир карда шуд.

Ҳангоми кофтукови шахсӣ аз ӯ 14 ҳазору 572 дона маводи тарфгарии пиротехникӣ дарёфт ва гирифта шуд. Аз рӯи ин ҳодиса тафтиш идома дорад.

Мақомоти корҳои дохилӣ аз шаҳрвандон хоҳиш менамояд, ки ба хотири ба даст овардани манфиати пулӣ меъёрҳои манъкунандаи қонунро сарфи назар накунанд. Волидонро низ  зарур аст дар ин самт фарзандонро назорат карда, оқибати чунин амалро ба онҳо фаҳмонанд.

София ШОИК,
АМИТ “Ховар”

АКСҲО: ВКД ҶТ