Рамазон Раҳимзода, Вазири корҳои дохилӣ: Бо талошу кӯшишҳои кормандони мақомоти ҳифзи ҳуқуқ вазъ дар Бадахшон ба эътидол омадааст

ДУШАНБЕ, 13.12.2021 /АМИТ «Ховар»/. Бо талошу кӯшишҳои кормандони мақомоти ҳифзи ҳуқуқ вазъ имрӯз дар Вилояти Мухтори Кӯҳистони Бадахшон ба эътидол омада, мардум ба кору зиндагӣ машғуланд. Ин нуктаро имрӯз, 13 декабр Вазири корҳои дохилии Ҷумҳурии Тоҷикистон, генерал-полковники милитсия Рамазон Раҳимзода зимни ҷаласаи ҷамъбасти фаъолияти фаврӣ-хизматии РВКД дар ВМКБ дар 11 моҳи соли равон иброз намуд, хабар медиҳад АМИТ “Ховар” бо истинод ба Вазорати корҳои дохилии Ҷумҳурии Тоҷикистон.

Сардори раёсати ВКД дар Бадахшон  генерал-майори милитсия Рустам Мирзомуродзода оид ба натиҷаҳои фаъолияти хизматӣ дар самтҳои ҳифзи тартиботи ҷамъииятӣ, пешгирии ҳуқуқвайрокуниҳо дар байни ноболиғону ҷавонон, бозрасии давлатии автомобилӣ, мубориза бо муомилоти ғайриқонунии воситаҳои нашъадор ва ғайра ибрози андеша намуд.

Рамазон Раҳимзода оид ба воқеаҳои рухдода дар шаҳри Хоруғ ва натиҷаҳои фаъолияти Ситоди байниидоравии мақомоти таъмини амният дар ВМКБ дар мубориза бо ҷинояткорӣ ва таъмини тартиботи ҷамъиятӣ иброз дошт, ки бо талошу кӯшишҳои кормандони мақомоти ҳифзи ҳуқуқ вазъ имрӯз дар вилоят ба эътидол омада, мардум ба фаъолият машғуланд.

Ҳамзамон тазаккур дода шуд, ки бо дастгириву ғамхориҳои Пешвои миллат муҳтарам Эмомалӣ Раҳмон Вилояти Мухтори Кӯҳистони Бадахшон сол аз сол рушду тараққӣ ёфта, ҳамасола корхонаҳо, бинову иншооти гуногун  мавриди истифода қарор мегиранд.

“Аммо бархе роҳбарон ва аъзои гурӯҳҳои муташаккили ҷиноятӣ бо содир намудани ҷиноятҳо, аз қабили муомилоти ғайриқонунии воситаҳои нашъадор, қочоқи силоҳ ва сангҳои қиматбаҳо вазъияти ҷомеаро дар шаҳри Хоруғ ноором сохта, ба ин амалҳои ҷинояткоронаи худ ноболиғону ҷавононро ҷалб карда истодаанд”,-гуфт Рамазон Раҳимзода.

Вазири корҳои дохилӣ ба кормандони милитсия дастур дод, ки барои суботу оромӣ ва осоиштагию амнияти шаҳрвандон вазифа ва уҳдадориҳои худро содиқона ва сарбаландона иҷро намоянд.

АСКҲО: ВКД ҶТ