Ҷаласаи шашуми Шӯрои миллии суботи молиявӣ дар Ҷумҳурии Тоҷикистон доир гардид

Январь 17, 2022 09:16

ДУШАНБЕ, 17.01.2022 /АМИТ «Ховар»/. Дар Бонки миллии Тоҷикистон ҷаласаи шашуми Шӯрои миллии суботи молиявӣ дар Ҷумҳурии Тоҷикистон (Шӯро) таҳти роҳбарии Раиси Шӯро – Вазири рушди иқтисод ва савдои Ҷумҳурии Тоҷикистон Завқӣ Завқизода бо иштироки роҳбарияти Бонки миллии Тоҷикистон, Кумитаи андози назди Ҳукумати Ҷумҳурии Тоҷикистон, Хазинаи суғуртаи пасандозҳои шахсони воқеӣ, бонкҳои давлатӣ ва намояндаи Вазорати молияи Ҷумҳурии Тоҷикистон баргузор гардид, хабар доданд аз Бонки миллӣ ба АМИТ «Ховар».

Дар ҳамоиш ҷараёни иҷрои қарорҳои қабулгардидаи ҷаласаи панҷуми Шӯро муҳокима гардида, гузориши масъулин оид ба андешидани тадбирҳои зарурӣ ҷиҳати зиёд намудани ҷалби сармоягузориҳои хориҷӣ ба иқтисодиёт, ба роҳ мондани баҳогузории рейтингии ташкилоти қарзии молиявӣ, инчунин дар самти танзим ва назорати ташкилоти ломбардӣ, такмили заминаи ҳуқуқӣ ва иҷрои пурраи талаботи қонунгузории ҷорӣ аз ҷониби ин ташкилот оид ба суғуртакунонӣ шунида шуд.

Зикр гардид, ки новобаста аз барқароршавии суръати рушди иқтисодиёти ҷаҳон, ҳанӯз ҳам номуайяниҳо ва муаммоҳо дар бозорҳои ҷаҳонӣ ва фазои иқтисодиёти ҷаҳон, аз қабили афзоиши талабот ва болоравии интизориҳои таваррумӣ, зиёдшавии хароҷот ва қарзи давлатӣ, таҳдид ба амнияти озуқаворӣ ва пайомадҳои манфии тағйирёбии иқлим дар ҷаҳон мушоҳида мегарданд, ки метавонанд ба иқтисодиёти миллӣ таъсир гузоранд. Вобаста ба вазъи кунунӣ ҳамкории доимӣ ва ҳамаҷонибаи вазорату идораҳои калидӣ ҷиҳати таъмини суботи молиявӣ, коҳиш додани таъсири хавфҳои берунию дохилӣ ва мусоидат ба рушди устувору фарогири миллӣ ба маврид мебошад.

Дар ҷаласа аъзои Шӯро бо пешниҳоди рӯнамоиҳо оид ба таъмини устувории фискалӣ вобаста ба қабули кодекси нави андоз, фаъолияти бонкҳои давлатӣ, роҳҳои коҳишдиҳии хавфҳои эҳтимолӣ дар онҳо ва раванди қарздиҳӣ дар низоми бонкӣ муҳокимаронӣ намуданд.

Гуфта шуд, ки дар ин шароити мураккаби иқтисодию геосиёсӣ ва тағйирёбиҳои зиёди ҷаҳонӣ масъалаи баланд бардоштани самаранокии идораи молияи давлатӣ, пешбурди низоми содакардашудаи андозбандӣ, тақвият бахшидани низоми идоракунии хавфҳо, беҳтар намудани раванди қарздиҳӣ, рушди соҳибкориву сармоягузорӣ ва дар ин замина таъмин намудани рушди минбаъдаи кишвар бо дарназардошти идома бахшидани ислоҳот дар самтҳои пешгирифта муҳим ба ҳисоб рафта, муайян намудани маҳдудият ва амалӣ намудани тадбирҳои мушаххас дар ин самт ба суръат бахшидани фаъолнокии бахшҳои соҳаҳои муҳими иқтисод мусоидат менамояд.

Шӯрои миллии суботи молиявӣ дар Ҷумҳурии Тоҷикистон мақоми байниидоравии доимоамалкунандаи машваратӣ буда, бо мақсади баррасии масъалаҳои таъмини суботи молиявӣ, муайян намудани хавфҳо ва минбаъд андешидани тадбирҳои зарурӣ ҷиҳати коҳиш додани хавфҳо дар иқтисодиёт, низоми молияи давлатӣ, бонкӣ ва бахши хусусӣ (бо қарори Ҳукумати Ҷумҳурии Тоҷикистон аз 21.июни соли 2018) таъсис дода шудааст.

АКС аз Бонки миллии Тоҷикистон

Январь 17, 2022 09:16

Хабарҳои дигари ин бахш

Раванди татбиқи лоиҳаҳои сармоягузорӣ бо дастгирии молиявии Бонки Олмонии рушд баррасӣ гардид
ҚУРБИ АСЪОР: дар Тоҷикистон 1 рубли русӣ аз 0.1251 то 0.1220 сомонӣ муқаррар шудааст
Дар Душанбе масъалаи таъмини бехатарии авиатсионии авиатсияи гражданӣ дар фурудгоҳҳои Тоҷикистон баррасӣ гардид
Дар Намоишгоҳи байналмилалии «KIWIE – 2025» занони тоҷик сазовори 10 медал гардиданд
Дар Душанбе Маркази фанноварии Эрону Тоҷикистон таъсис дода мешавад
Зимбабве таҷрибаи Тоҷикистонро дар самти истифодаи манбаъҳои барқароршавандаи энергия истифода менамояд
ҚУРБИ АСЪОР: дар Тоҷикистон 1 доллари ИМА аз 9.7700 то 9.9500 сомонӣ муқаррар шудааст
Байни Тоҷикистон ва Арабистони Саудӣ ҳамкорӣ дар истифодаи устувори захираҳои об тақвият меёбад
Иштирокдорони Конфронси байналмилалии сатҳи баланд оид ба ҳифзи пиряхҳо тавассути VR айнакҳо пиряхҳои Тоҷикистон ва ҷаҳонро тамошо намуданд
Дар Рашт ҷаласаи комиссияи корӣ оид ба истифодаи неруи барқ доир гардид
ҚУРБИ АСЪОР: дар Тоҷикистон 1 рубли русӣ аз 0.1265 то 0.1250 сомонӣ муқаррар шудааст
Соҳибкорзан Зарринаи Сафаралӣ: «Дастрасӣ ба гранти президентӣ омили пешрафти соҳибкории занон аст»