Толибон* профессори қаблан боздоштшудаи Донишгоҳи Кобулро озод намуданд

Январь 12, 2022 12:00

ДУШАНБЕ, 12.01.2022 /АМИТ «Ховар»/. Профессори Донишгоҳи Кобул ва коршиноси сиёсӣ Файзулло Ҷалол, ки қаблан аз сӯи намояндагони ҷунбиши «Толибон»* (ташкилоте, ки фаъолияташ дар Тоҷикистон мамнӯъ аст) боздошт шуда буд, пас аз чаҳор рӯзи боздошт  11 январ раҳо шуд. Тавре АМИТ «Ховар» хабар дод, дар ин бора шоми дирӯз рӯзномаи «8 Субҳ» хабар дод.

Гуфта мешавад, ки иттилоъ дар бораи раҳоии профессорро аъзои хонаводаи ӯ ва ҳамчунин манобеи худи нашрия таъйид кардаанд.

Тавре АМИТ «Ховар» қаблан хабар дода буд, Файзулло Ҷалол рӯзи шанбеи 8 январ боздошт шуд. Сабаби боздошт метавонад суханронии профессор дар шабакаи телевизионии Tolo News аз 20 ноябри соли 2021 бошад. Он вақт вай толибонро айбдор намуда, гуфт, ки онҳо қудратро монополия карда, озодии баёнро пахш мекунанд.

Дар ҷараёни пахши телевизионӣ профессори илмҳои ҳуқуқ ва сиёсат толибонро интиқод карда, бо яке аз меҳмонони ин барнома- сухангӯи “Толибон” Муҳаммад Наим ба баҳси тунд пардохт.

«Ман аз вазъи кунунии Кобул эҳсоси дард мекунам», гуфт Ҷалол. — Мардум чизе барои хӯрдан надоранд. Ин чӣ гуна амният аст? Ҳеҷ кас чизе гуфта наметавонад».

Олим ҳамчунин Наимро «гӯсола» номид, ки ин  дар Афғонистон таҳқир ҳисобида шуда, маънояш «аҳмақ» аст. Ин баъди он ба амал омад, ки Наим саломатии рӯҳии Ҷалолро зери шубҳа гузошт ва тасдиқ кард, ки коммунист аст.

Клипҳои тафсирии Ҷалол дар шабакаҳои иҷтимоӣ паҳн шуданд ва бисёре аз афғонҳо аз шуҷоати ӯ ситоиш карданд. Бархе аз афғонҳо ба нишони ҳамраъйӣ акси ӯро дар профилҳои худ гузоштаанд.

Дар вокуниш ба ғазаб аз боздошти Ҷалол, сухангӯи толибон Забеҳулло Муҷоҳид дар Твиттер навишт, ки профессор барои изҳороти беасос ва таҳрики мардум алайҳи “Толибон”* боздошт шудааст.

Муҷоҳид инчунин скриншотҳоро аз саҳифаи тасдиқнашудаи Твиттер, ки ба гуфтаи ӯ, ба Ҷалол тааллуқ дорад, мубодила кард. Дар саҳифа иттиҳомоти ҷиддӣ алайҳи “Толибон”* мавҷуданд.

Аммо Ҳасина Ҷалол ин саҳифаро, ки толибон ба падараш нисбат дода буданд, қалбакӣ номид. Баъдтар онро соҳиби он ё шабакаҳои иҷтимоӣ нест карданд.

Бисёре аз созмонҳои ҳомии ҳуқуқи башар боздошти профессорро кӯшиши толибон барои маҳдуд кардани озодии баён арзёбӣ карда, озодии ӯро талаб кардаанд. Занони афғон дар Кобул боз эътироз карданд. Созмонҳои байналмилалии дифоъ аз ҳуқуқи башар, аз ҷумла Афви Байналмилалӣ (Amnesty International)  ва Дидбони ҳуқуқи башар (Human Rights Watch) низ аз боздошти Ҷалол изҳори нигаронӣ кардаанд. «Бо вуҷуди он ки хонаводаи Файзулло Ҷалол тасдиқ кардаанд, ки саҳифаи Твиттере, ки ба номи ӯ сохта шудааст, қалбакӣ аст, ӯ дар ҳабс боқӣ мемонад. Толибон бояд ӯро фавран ва бидуни қайду шарт озод кунанд», гуфт Самира Ҳамидӣ, фаъоли афғон ва фаъоли Афви Байналмилалӣ дар Осиёи Ҷанубӣ ба The Guardian.

___________________

* Толибон – созмоне, ки дар Тоҷикистон ва кишварҳои дигар мамнӯъ аст

                                                                                    АКС аз бойгонӣ

 

Январь 12, 2022 12:00

Хабарҳои дигари ин бахш

ДАР ПАРТАВИ ҲИДОЯТҲОИ ПЕШВОИ МИЛЛАТ. Дар Тоҷикистон ба 300 оила кумаки башардӯстона расонида шуд
Сокинони деҳаи Гожаки ноҳияи Шуғнон соҳиби нуқтаи оби тозаи нӯшокӣ шуданд
БРИТАНИЯИ КАБИР БА ҶАЛБИ ҚУВВАИ КОРӢ АЗ ТОҶИКИСТОН ОМОДА АСТ. Имсол 500 нафар шаҳрвандони Тоҷикистон ба Британияи Кабир сафарбар мегарданд
Дар Агентии хизмати давлатӣ масъалаи пардохти музди меҳнати хизматчиён ҳангоми таҳсил баррасӣ гардид
ШАҲРИ ЗЕБОИ МАН. Милитсияи Хатлон ба истиқболи 35-солагии Истиқлоли давлатӣ ба бунёдкорӣ иқдом гирифт
«МАКТАБИ СИЁСИИ ПЕШВОИ МИЛЛАТ». Таҳти ин унвон дар шаҳри Бохтар конференсияи байналмилалии илмӣ-амалӣ доир мегардад
ХУРОФОТ ҶАҲОЛАТ АСТ. Дар ҷамоатҳои шаҳри Исфара бо сокинон оид ба хатари таассуб мулоқот доир шуд
Охири моҳи апрел ва аввали май Тоҷикистонро ҳавои номусоид интизор аст. Таъсири он ба соҳаи кишоварзӣ чӣ гуна аст?
Дар якчанд минтақаҳои Тоҷикистон корҳои безараргардонии жола анҷом ёфтанд
«ДӮСТ ОЯД ГАРМ ДАР ОҒӮШ ГИР!». Дар Тоҷикистон аввалин меҳмонии ҷавонони ҷумҳурӣ дар минтақаҳо оғоз шуд
Дар Конибодом доир ба оқибатҳои ногувори таассубу хурофотпарастӣ ва омилҳои пешгирии он мулоқот доир шуд
Дар Душанбе масоили ҳуқуқ, таҳсил ва бокортаъминкунии маъюбон таҳлилу баррасӣ гардид