Ҳамкории милитсия бо сокинони шаҳри Душанбе тақвият меёбад

ДУШАНБЕ, 16.02.2022 /АМИТ «Ховар»/. Маҳз шароити мусоиди фароҳамгашта ва иҷрои баланди уҳдадориҳои хизматӣ имкон дод, ки сол аз сол сатҳи содиршавии ҷинояту амалҳои нописанд дар ҷомеа коҳиш ёфта, милитсияи пойтахт бо амалигардонии тарзу усулҳои нави корбарӣ минбаъд низ пеши роҳи ҳама гуна ҷинояткориро гирифта тавонад. Чунин изҳори назар намуд сардори Раёсати ВКД дар шаҳри Душанбе Шариф Назарзода зимни мулоқот бо фаъолону сокинон ва раисони маҳаллаҳо дар ноҳияи Исмоили Сомонии шаҳри Душанбе.

Тавре дар Раёсати мазкур ба АМИТ «Ховар» хабар доданд, бо мақсади шарҳу тавзеҳи нуктаҳои муҳими Паёми Пешвои миллат ва иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки дар Паёми навбатӣ ироа гардидаанд, чанд рӯз инҷониб силсиламулоқоту суҳбатҳои озоду ошкорои сардори Раёсати ВКД дар шаҳри Душанбе Шариф Назарзода бо фаъолону сокинон ва раисони маҳаллаҳо дар ноҳияҳои шаҳри Душанбе баргузор гардида истодаанд.

Чунин мулоқот дар мақомоти иҷроияи ҳокимияти давлатии ноҳияи Исмоили Сомонии шаҳри Душанбе баргузор гардид, ки дар он сардори Раёсати ВКД дар шаҳри Душанбе Шариф Назарзода, комиссари ҳарбии шаҳри Душанбе Муҳаммад Абдухолиқзода, муовини раиси ноҳияи Исмоили Сомонӣ Илҳом Мусозода ва фаъолону сокинони ноҳия ширкат варзиданд.

Сардори мақомоти милитсияи пойтахт дар доираи Паёми раҳнамунсози Президенти кишвар муҳтарам Эмомалӣ Раҳмон оид ба   баланд бардоштани савияи ҳуқуқию зиракии сиёсӣ, эҳёи суннатҳои миллию арҷгузорӣ ба арзишҳои фарҳангӣ, пешгирии амалу кирдорҳои номатлуб ва баланд бардоштани эҳсоси ватандӯстиву ҳифзи марзу буми аҷдодӣ сухан гуфт.

Зикр шуд, ки дар доираи иҷрои дастуру супоришҳои роҳбарияти  Мақомоти иҷроияи ҳокимияти давлатии шаҳри Душанбе, махсусан Қарори Раиси шаҳри Душанбе гурӯҳҳои тарғиботиву ташвиқотӣ ташкил шудаанд, ки кормандони милитсия дар якҷоягӣ бо дигар институтҳои ҷамъиятӣ санҷишу амалиёти муштарак ва мулоқоту суҳбатҳои профилактикӣ гузаронида, маърифату одоби шаҳрдории сокинони пойтахтро баланд мебардоранд.

АКСҲО: Раёсати ВКД дар шаҳри Душанбе