Дар Душанбе лоиҳаи «Системаи идоракунии партовҳои сахти маишӣ»-ро таҳия менамоянд

ДУШАНБЕ, 16.02.2022. /АМИТ «Ховар»/. Мақомоти иҷроияи ҳокимияти давлатии шаҳри Душанбе нақша дорад, ки лоиҳаи «Системаи идоракунии партовҳои сахти маишӣ»-ро таҳия ва татбиқ намояд. Ин масъала зимни вохӯрии муовини якуми Раиси шаҳри Душанбе Ҷамшед Табарзода бо директори Корхонаи воҳиди давлатии «Шаҳри ҳушманд (Smart city)» Саъдӣ Самадзод ва муовини директори Бонки Аврупоии Таҷдид ва Рушд Талай Асилбеков баррасӣ гардид, иттилоъ медиҳад АМИТ «Ховар» бо истинод бо сомонаи Корхонаи воҳиди давлатии «Шаҳри ҳушманд (Smart city)».

Дар доираи оғози татбиқи ин лоиҳа мақомоти иҷроияи ҳокимияти давлатии шаҳр нақша дорад, ки системаи идоракунии интеллектуалӣ таъсис дода, инчунин гурӯҳи татбиқи лоиҳа дар назди Корхонаи воҳиди давлатии «Шаҳри ҳушманд (Smart city)» – и мақомоти иҷроияи ҳокимияти давлатии шаҳри Душанбе таъсис дода шавад.

Дар вохӯрӣ муовини якуми Раиси шаҳри Душанбе Ҷамшед Табарзода сухан гуфта, аҳамияти таҳияи лоиҳаҳо дар соҳаи шаҳрҳои ҳушмандро таъкид кард.

Дар ҷараёни вохӯрии мазкур Барномаи “Шаҳри Сабз” мавриди муҳокима қарор дода шуд, ки лоиҳаҳои муҳими барномаи мазкур системаи идоракунии партовҳои сахти маишӣ, нақлиёти ҷамъиятӣ, таъминоти гармидиҳӣ ва обтаъминкуниро дар бар мегирад.

Вохӯрӣ дар вазъияти дӯстона гузашта, ҷонибҳо ниятҳои худро барои ҳамкории минбаъда ва рушди муносибатҳо изҳор намуданд.

АКС: Корхонаи воҳиди давлатии «Шаҳри ҳушманд (Smart city)»