Парлумони Тоҷикистон воридоти молҳоро бидуни боҷи воридотӣ маъқул донист

ДУШАНБЕ, 10.02.2022 /АМИТ «Ховар»/. Вакилони Маҷлиси намояндагони Маҷлиси Олии Ҷумҳурии Тоҷикистон тағйироту иловаҳо ба Қонун “Дар бораи буҷети соли 2022”-ро қабул карданд. Бо дарназардошти ин тағйирот воридоти имтиёзноки баъзе ашёи зарурӣ барои таъмини захираҳои давлатӣ ба нақша гирифта шудааст, хабар медиҳад мухбири АМИТ «Ховар». 

Муовини Вазири молияи Тоҷикистон Карим Гулмуродзода гуфт, ки ҳангоми ба кишвар ворид намудани маҳсулоти ғизоӣ, нуриҳои минералӣ, сӯзишвории дизелӣ ва бензин боҷ, андоз аз арзиши изофа ва аксиз ситонида намешаванд. 

Вай таъкид кард, ки чунин созишномаи консессионӣ аз ҷониби Агентии захираҳои моддии давлатии назди Ҳукумати ҷумҳурӣ дар соли 2022 қабул шудааст.

Ба гуфтаи муовини вазир, миқдор ва номгӯи молҳоеро, ки боҷ, андоз ва аксиз ситонида намешаванд, ҳукумат тасдиқ мекунад. Маҳсулоти бо шартҳои имтиёзнок воридшуда барои эҷоди захираҳои давлатӣ истифода мешавад.

АКС: АМИТ «Ховар»