Дар доираи Форуми чоруми байнипарлумонӣ ҷаласаи «Ҳамгироии иқтисодӣ, рушди устувор ва тавсеаи шарикии минтақавӣ» баргузор гардид

Октябрь 29, 2026 14:20

ДУШАНБЕ, 29.10.2026 /АМИТ «Ховар»/. Дар шаҳри Душанбе дар доираи баргузории Форуми чоруми байнипарлумонии давлатҳои Осиёи Марказӣ ҷаласаи дуюм таҳти унвони «Ҳамгироии иқтисодӣ, рушди устувор ва тавсеаи шарикии минтақавӣ» доир шуд, иттилоъ медиҳад АМИТ «Ховар».

Дар ҷаласа масъалаҳои густариши ҳамкории иқтисодии давлатҳои минтақа, рушди савдои мутақобила, ҷалби сармоягузорӣ, таҳкими робитаҳои нақлиётиву логистикӣ ва ҳамкорӣ дар соҳаи энергетика баррасӣ шуданд.

Зимни ҷаласа иброз гардид, ки ҳамкории иқтисодӣ яке аз заминаҳои муҳими рушди устувори Осиёи Марказӣ буда, густариши робитаҳои тиҷоратӣ, татбиқи лоиҳаҳои муштарак ва истифодаи самараноки имкониятҳои мавҷуда барои баланд бардоштани сатҳи зиндагии мардум аҳаммияти муҳим дорад.

Ҳамчунин ба дастгирии соҳибкории хурду миёна, тақвияти ҳамкории саноатӣ, рақамикунонии робитаҳои иқтисодӣ ва ҷорӣ намудани технологияҳои сарфакунандаи захираҳо таваҷҷуҳ зоҳир карда шуд.

Раиси кумитаи Маҷлиси миллии Маҷлиси Олии Ҷумҳурии Тоҷикистон оид ба ҳамоҳангсозии фаъолияти Маҷлиси миллӣ бо Маҷлиси намояндагон, ҳокимияти иҷроия, иттиҳодияҳои ҷамъиятӣ, воситаҳои ахбори омма ва робитаҳои байнипарламентӣ Қобилҷон Хушвахтзода иброз намуд, ки ҳамкории иқтисодӣ ҳамчун заминаи муҳим ва аз бисёр ҷиҳат муайянкунанда барои рушди устувори Осиёи Марказӣ хизмат мекунад. Густариши савдои мутақобила, таҳкими ҳамкорӣ дар соҳаи сармоягузорӣ, мустаҳкам намудани робитаҳои нақлиётию логистикӣ ва эҷоди шарикии энергетикӣ барои кишварҳои мо имкониятҳои бузургро фароҳам меоранд. Дар айни замон, ин равандҳо масъулияти муштараки моро барои табдил додани имкониятҳои мазкур ба амалҳои мушаххас тақозо мекунанд. Дастгирии корхонаҳои хурду миёна, рушди ҳамкории саноатӣ, пешбурди рақамисозӣ ва ҷорӣ намудани технологияҳои сарфакунандаи захираҳо сазовори таваҷҷуҳи хоса мебошанд.

Иштирокчиён нақши парламентҳоро дар такмили заминаи ҳуқуқии ҳамкории минтақавӣ, дастгирии ташаббусҳои муштарак ва рушди ҳамкории байни кумитаҳои соҳавӣ муҳим арзёбӣ намуданд.

Таъкид шуд, ки заминаи мукаммали қонунгузорӣ барои татбиқи амалии лоиҳаҳои муштарак ва фароҳам овардани шароити мусоид барои рушди иқтисодӣ мусоидат менамояд.

Дар ҷаласа намояндагони парламентҳои давлатҳои Осиёи Марказӣ, аз ҷумла Қазоқистон, Туркманистон ва Узбекистон доир ба масъалаҳои ҳамкории иқтисодӣ ва рушди шарикии минтақавӣ андешаву пешниҳодҳои худро иброз доштанд.

Зимни ҷамъбасти ҷаласа зарурати идомаи табодули таҷриба байни кумитаҳои соҳавии парламентҳо, такмили саривақтии қонунгузорӣ ва дастгирии ташаббусҳое, ки ба манфиатҳои дарозмуддати давлатҳо ва мардумони минтақа ҷавобгӯ мебошанд, таъкид гардид.

Ёдовар мешавем, ки 28–29 октябри соли 2026 дар шаҳри Душанбе Форуми чоруми байнипарламентии давлатҳои Осиёи Марказӣ таҳти шиори «Ваҳдат ба хотири сулҳ, амният ва шукуфоии Осиёи Марказӣ» баргузор шуд.

Зарангези ЛАТИФ,
АМИТ «Ховар»

АКС: АМИТ «Ховар»

Октябрь 29, 2026 14:20

Хабарҳои дигари ин бахш

Ҳайати Маҷлиси намояндагони Маҷлиси Олии Ҷумҳурии Тоҷикистон бо Раиси Палатаи вакилони Парламенти Люксембург мулоқот намуд
Файзалӣ Идизода дар Шуро ва ҷаласаи 61-уми пленарии Ассамблеяи байнипарлумонии давлатҳои ИДМ иштирок намуд
Дар Брюссел ҷаласаи XIII Кумитаи ҳамкории парламентии Ҷумҳурии Тоҷикистон ва Иттиҳоди Аврупо доир шуд
Файзалӣ Идизода дар мулоқоти Гурбонгулӣ Бердимуҳамедов бо роҳбарони ҳайатҳои парлумонии кишварҳои ИДМ иштирок намуд
Дар Тоҷикистон ҳаҷми Маҷмуи маҳсулоти дохилӣ 18,4 миллиард сомонӣ зиёд гардид
Ҳайати парлумонии Тоҷикистон дар ҷаласаи 61-уми пленарии Ассамблеяи байнипарламентии ИДМ иштирок менамояд
Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Эҳтиром ба Рӯзи Президент эҳтиром ба давлат, миллат, Истиқлолияти давлатӣ ва сулҳу ваҳдат аст
Китоби «Президент ва ниҳоди президентӣ дар Ҷумҳурии Тоҷикистон» рӯнамоӣ гардид
Дар Маҷлиси намояндагон бахшида ба Рӯзи Президенти Тоҷикистон ҳамоиш баргузор гардид
ИҶЛОСИЯИ XVI ШУРОИ ОЛӢ ВА РӮЗИ ПРЕЗИДЕНТ. Таҳлили ҳуқуқии мафҳумҳои конститутсионӣ ва таърихии давлатдорӣ
ДАР МЕҲВАРИ СУЛҲ, ВАҲДАТ ВА СОЗАНДАГӢ. Мулоҳизаҳо оид ба рисолати таърихии Пешвои миллат муҳтарам Эмомалӣ Раҳмон